Almatyda Prezıdent tapsyrmasy aıasynda «jurtqa jaqyn polısıa» jańa formaty boıynsha keshendi sharalar qabyldanyp jatyr, dep habarlaıdy Almaty-akshamy.kz.
«Jurtqa jaqyn polısıa» qaǵıdatyn júzege asyratyn basym býyn – ýchaskelik polısıa ınspektorlary. 2020 jyly ınspektorlardyń sany nebári 480 bolatyn. Bizdiń shahar úshin jetkiliksiz edi. Sondyqtan, ótken jyly ákimdiktiń qoldaýymen 113 ýchaskelik polısıa kómekshisi ýchaskelik ınspektor laýazymyna aýystyryldy. Osylaısha, búginde qalada 593 ýchaskelik ınspektor jumys isteıdi, bul quqyq buzýshylyqpen kúrestiń tıimdiligin aıtarlyqtaı arttyrady», – dedi Almaty qalalyq polısıa departamentiniń bastyǵy Qanat Taımerdenov.
Sonymen qatar, byltyr 3 jyldyq jospar bekitildi. Onda polısıanyń ýchaskelik pýnktteri úshin 29 ǵımaratty kezeń-kezeńimen alý kózdelgen. Jańa turǵyn úı keshenderinen 9 bólme satyp alyndy.
«Búginde ýchaskelik ınspektorlar mobıldi jáne únemi baılanysta. Árbir ýchaskelik polısıa qyzmetkeri PIK-pen jáne aýdan turǵyndarymen chat, messendjer arqyly baılanys ornatqan. Barlyq suraqtar olarǵa tikeleı joldanady. Osy tásildiń arqasynda biz turǵyndardan túsetin ótinishterdiń sanyn 2,5 esege qysqarttyq. Sonymen qatar, barlyq aýdandyq polısıa bólimderinde front-keńseler jumys isteıdi. Azamattarǵa ashyq bolý úshin barlyq sharalardy qoldanyp otyrmyz. Memleket basshysynyń tapsyrmasyn oryndaý maqsatynda ótken jyly barlyq tergeýshi, anyqtaýshy men jedel ýákilderdiń kabınetterine beınebaqylaý kameralaryn ornattyq. Endi bıyl barlyq ýchaskelik polısıa pýnktterinde beınekameralar ornatylady», - dedi Almatynyń bas polıseıi.