«Qazaqstannyń HH ǵasyrdaǵy jáne qazirgi zamanǵy sándik-qoldanbaly óneri» katalogy – atalǵan óner mýzeıiniń qoryndaǵy sándik-qoldanbaly óner týyndylarynyń alǵash ret tolyq kólemde usynylǵan basylymy. 1938 jyldan 2024 jylǵa deıingi kezeńdi qamtıtyn bul otandyq óner tarıhynda mańyzdy kórkemdik qubylys bolyp tabylatyn týyndylar qory shamamen segiz júzge jýyqtaıdy.
Koleksıanyń qalyptasý jyldarynda shyǵarmashylyqpen belsendi aınalysqan sýretshilerdiń qatarynda Ábilhan Qasteev, Nıkolaı Sıvchınskıı, Aleksandr Rıttıh, Shajat Ospanovtardy ataýǵa bolady. Olardyń eskızderi boıynsha «Kilemshi» arteliniń sheberleri alǵashqy qazaqstandyq gobelenderdi jasap, bul eńbekter «Máńgilik mura – ýaqytpen úndesken óner» kórmesinde keńinen usynylady.
«Meniń oıymsha, Qazaqstannyń HH ǵasyrdaǵy jáne qazirgi zamanǵy avtorlardyń sándik-qoldanbaly óneriniń tolyq koleksıasyn alǵash ret kórsetetin ǵylymı katalogtyń shyǵarylýy osy baǵytty ári qaraı zertteýdiń negizi bolyp tabylady. Jas sýretshiler men ónertanýshylar úshin óz daǵdylaryn jetildirýge shabyt kózi bolady. Biz úshin bul basylymnyń jaryqqa shyǵýy Qazaqstan Respýblıkasyndaǵy jetekshi kórkem óner mýzeıiniń 90 jyldyǵymen jáne «Ulttyq» mártebesin alýymen tuspa tus kelýi qýantarlyq jáıt. Árıne, mýzeı koleksıany tolyqtyrý, keńeıtý, zertteýmen qatar, nasıhattaý úshin barlyq kúsh-jigerin jumsaıdy. Ony urpaqtarǵa saqtap, mádenı muranyń jandanǵan sabaqtastyǵyn qamtamasyz etý úshin jaǵdaı jasaıtyny anyq», – deıdi Ábilhan Qasteev atyndaǵy QR Memlekettik óner mýzeıiniń dırektory G.Jumabekova.
Ekspozısıaǵa elimizdiń tanymal kásibı sándik-qoldanbaly óner sheberleri jasaǵan 90-ǵa jýyq týyndy usynylǵan. Olardyń arasynda kilemder, gobelender, kıiz, keste pannolar jáne teri, aǵash, metal jáne tas, qysh, farfor, shynydan jasalǵan kórkem zattar, sondaı-aq melhıor men kúmisten jasalǵan avtorlyq zergerlik buıymdar bar. «Máńgilik mura – ýaqytpen úndesken óner» kórmesi men aıtýly katalogtyń tusaýkeserinde tanymal qazaqstandyq dızaıner Aıjan Abdýbaıttiń «Zer-ǵumyr» kıim koleksıasy kórsetildi.
