Almatyda Túrki memleketteri uıymynyń IV Halyqaralyq jastar festıvaliniń saltanatty ashylý rásimi ótti. İs-sharaǵa Qazaqstan Respýblıkasynyń Mádenıet jáne aqparat mınıstri Aıda Balaeva, Túrki memleketteri uıymynyń Bas hatshysy Kýbanychbek Omýralıev jáne Almaty qalasynyń ákimi Darhan Satybaldy qatysty.
Saltanatty jıynǵa jınalǵandardy quttyqtaǵan Mádenıet jáne aqparat mınıstri Memleket basshysy Qasym-Jomart Toqaevtyń atynan joldanǵan quttyqtaý jedelhatyn oqyp berdi.
«Almaty - azattyǵymyzdyń altyn besigi, jasampaz jastardyń qutty mekeni. Órkenıetimizdiń órisin keńeıtýge ólsheýsiz úles qosqan kóptegen uly tulǵalarymyz osy qalada ósip-óngen. Shyn máninde, tól mádenıetimizdiń temirqazyǵyna aınalǵan shejireli shahar qazaq eliniń ǵana emes, túrki memleketteriniń de rýhanı ordasy sanalady», - delingen jedelhatta.
Prezıdent sondaı-aq, Almatyǵa «2025 jyl – Túrki áleminiń jastar astanasy» mártebesiniń berilýimen barshany quttyqtaǵan.
İs-shara barysynda Almatyǵa resmı túrde «2025 jyly – Túrki áleminiń jastar astanasy» mártebesi berildi. Bul jastar saıasatyn damytýdaǵy qalanyń belsendi rólin aıqyndap, túrki dúnıesi elderi arasyndaǵy yntymaqtastyqty nyǵaıtýdyń jańa kezeńine jol ashty. Buǵan deıin bul ataq Ázerbaıjannyń Lenkoran qalasyna berilgen edi.
Abaı alańyndaǵy saltanatty rásim qazaqstandyq estrada juldyzdary men shyǵarmashylyq ujymdardyń qatysýymen ótken konserttik baǵdarlamaǵa ulasty. Merekelik shoý túrki memleketteri jastarynyń dostyǵy men birliginiń nyshanyna aınaldy.
Jyl boıy Almatyda halyqaralyq jastar kempıngi, «Digital Turkic Youth» forýmy, «Jaıdarman fest» festıvali jáne ekologıa, mádenıet pen jastar bastamalaryna arnalǵan basqa da jobalar uıymdastyrylady. Bul is-sharalar túrki dúnıesi jastarynyń birligi men shyǵarmashylyǵynyń, jasampazdyǵynyń aıqyn kórinisi bolmaq.