Almaty qalasynda bir jyldyq túrik tili kýrsynyń saltanatty jabylý keshi ótti.
Shara barysynda kýrs qatysýshylary – stýdentter men oqytýshylarǵa arnaıy sertıfıkattar tabystalyp, úzdikterge Túrkıa Respýblıkasynda eki aptalyq bilim baǵdarlamasyna joldama berildi, dep habarlaıdy aqshamnews.kz.
Keshke Túrkıa Respýblıkasynyń Almatydaǵy Bas konsýldyǵynyń ókili Aıhan Korkmaz, Almaty memlekettik bıznes kolejiniń dırektory Aınur Qýanyshqyzy jáne oqý úderisine belsendi qatysqan oqytýshylar men stýdentter qatysty.
Memleket basshysy Qasym-Jomart Toqaevtyń: «Básekege qabiletti bolýdyń birden-bir joly – kóp til bilý. Ásirese, shet tilderin meńgerý – jańa múmkindikterge jol ashady» degen sózi bul keshtiń máni men mazmunyn ashyp turǵandaı. Túrik tiline degen qyzyǵýshylyqtyń artýy – Qazaqstan men Túrkıa arasyndaǵy mádenı jáne bilim baılanysynyń aıqyn kórinisi.
Shara barysynda sóz alǵan Almaty memlekettik bıznes kolejiniń dırektory Aınur Qýanyshqyzy:
«Búgin – bir jyldyq eńbektiń qorytyndysy. Bul kýrs stýdentterimizge tek til úıretip qana qoımaı, Túrkıa mádenıetimen etene tanysýǵa múmkindik berdi. Mundaı jobalar aldaǵy ýaqytta da jalǵasyn tabady dep senemiz. Ustazdarymyzǵa, qoldaý bildirgen taraptarǵa alǵysym sheksiz», – dedi.
Keshtiń qurmetti qonaǵy, Túrkıa Respýblıkasynyń Almatydaǵy Bas konsýldyǵynyń ókili Aıhan Korkmaz myrza:
«Qazaqstan men Túrkıa arasyndaǵy dostyq – tereń tarıhı negizge ıe. Osyndaı bastamalar bul baılanysty odan ári nyǵaıta túsedi. Túrik tilin úırenip jatqan jastar – bizdiń bolashaq mádenı elshilerimiz», – dep atap ótti.
Saltanatty kesh barysynda óz kásibıligimen kózge túsken oqytýshy Muhammed Ashchyǵa arnaıy alǵys bildirilip, úzdik jeti stýdent pen úsh muǵalimge Túrkıa memleketinde eki aptalyq tegin bilim baǵdarlamasyna joldama berildi.
Joldama alǵan ustazdardyń biri – kolej oqytýshysy Sholpan Maratqyzy bul múmkindikti zor qýanyshpen qabyldaǵanyn jetkizdi:
«Túrkıaǵa baryp, bilimimizdi tereńdetýge múmkindik alǵanymyz – úlken mártebe. Bul tek kásibı damý ǵana emes, eki el arasyndaǵy dostyqty tereń túsinýge jol ashady. Ózim de osy kýrs arqyly túrik tiline degen qyzyǵýshylyǵymdy arttyrdym. Bolashaqta bul tildi oqytýmen de aınalysqym keledi», – dedi ustaz óz pikirinde.
Sondaı-aq, joldama alǵan stýdentterdiń biri – kolejdiń úzdik bilim alýshylarynyń qataryndaǵy Tólegen Nurasyl:
«Bir jyl ishinde tek til úırenip qana qoımaı, jańa dostar taýyp, shet el mádenıetin tanýǵa múmkindik aldyq. Túrkıaǵa sapar – men úshin úlken arman edi. Bul múmkindik úshin barlyq ustazdarǵa alǵysym sheksiz», – dep áserimen bólisti.
Aıta keteıik, bul túrik tili kýrsy 5 jylǵa jalǵasatyn joba retinde josparlanyp otyr. Jyl saıyn jańa toptar qabyldanyp, úzdikterge Túrkıada bilimin jalǵastyrý múmkindigi berilmek.
Saltanatty kesh jyly júzdesýlermen, shyǵarmashylyq qoıylymdarmen jáne shynaıy alǵys sózderimen jalǵasty. Kýrs túlekteri bolashaqta túrik tilin kásibı deńgeıde meńgerip, bilim men mádenıet kópirin jalǵaıtyn mamandar qataryna qosylýǵa nıetti.