Almatyda zamanaýı ári yńǵaıly avtoturaq júıesin qurý boıynsha jumys kezeń-kezeńimen júrgizilip keledi. Búginde qalada 18 myńnan astam turaq orny bar, al jyl sońyna qaraı olardyń sanyn 30 myńǵa deıin arttyrý josparlanyp otyr.
«Aqyly avtoturaq kólik qozǵalysyn baqylaýǵa jáne júrgizýshilerdi ereje saqtaýǵa yntalandyrady. Almatyda kólik sanynyń kóbeıýine qaraı bul mańyzdy is-shara. Joba turaq oryndaryn ońtaılandyrýǵa jáne qozǵalysty jaqsartýǵa baǵyttalǵan. Aqyly turaqtar engizý kezdeısoq qoıylǵan kólik sanyn azaıtady. Sondaı-aq, múmkindigi shekteýli jandar úshin arnaıy turaq qarastyrylady», - dedi Almaty qalasy «Almaty Parkıng» mekemesi dırektorynyń orynbasary Talant Taınov.
Jaqynda Almaly, Áýezov, Bostandyq jáne Medeý aýdandaryndaǵy kólik kóp júretin kóshelerdiń boıynda trotýar úlgisindegi jańa avtoturaqtar ashyldy.
Munda jaqyn mańda turatyn jandardyń jaılylyǵyna erekshe nazar aýdarylady. Turaq 08:00-den 19:00-ge deıin ǵana aqyly, al keshki jáne túngi ýaqytta tegin. Sonymen qatar, qazirgi ýaqytta turǵyndar úshin aı saıynǵy abonementti engizý máselesi pysyqtalyp jatyr. Iaǵnı, jeńil tarıfti rezıdenttik kelisim qarastyrylýda.
Avtoturaq aýmaǵyn keńeıtý qalanyń ortalyq aýdandaryndaǵy keptelisti azaıtý jónindegi keshendi baǵdarlamanyń bir bóligi bolyp tabylady. Qajetti belgilerdi ornatý, belgileý jáne aqparattyq taqtaıshalardy montajdaý boıynsha barlyq jumys kezeń-kezeńimen júrgiziledi. Atqarylǵan jumystar týraly turǵyndarǵa BAQ arqyly aldyn ala habarlanady.