Almatyda 2025–2026 jylǵy jylytý maýsymy bastaldy. Bul maýsymda alǵash ret jylý jelilerin sıfrlyq júıe arqyly baqylamaq. Qalalyq Energetıka jáne sýmen jabdyqtaý basqarmasynyń basshysy Nurbaqyt Serikbaı Óńirlik komýnıkasıalar qyzmetinde osylaı dedi.
Onyń aıtýynsha, «Almatyteplokommýnenergo» JSHS nysandarynda qysym men temperatýrany onlaın rejımde baqylaýǵa múmkindik beretin pılottyq joba iske qosylǵan. Bul júıe jylý jelileriniń jaǵdaıyn naqty ýaqyt rejıminde baqylap, oqys jaǵdaıda jedel qımyldaýǵa múmkindik beredi.
«Endigi ýaqytta biz apatpen kúresip qana qoımaı, olardyń aldyn ala bastaımyz. Júıe temperatýra, qysym men jylý tasymaldaǵyshtyń shyǵynyn tirkep, derekti dıspecherlik ortalyqqa jiberedi. Osylaısha, biz aqaýdy turǵyndarǵa jetkizbeı, joıyp jibere alamyz», — deıdi spıker.
Sarapshylardyń aıtýynsha, bul jylytý maýsymy «aqyldy komýnaldyq júıege» kóshý kezeńi bolmaq. Onda baryq ınjenerlik jeli biryńǵaı sıfrlyq platformaǵa biriktiriledi.