Qazaqstan Respýblıkasy Premer-mınıstriniń orynbasary – Syrtqy ister mınıstri Murat Nurtileý Táýelsiz Memleketter Dostastyǵy Syrtqy ister mınıstrleri keńesiniń kezekti otyrysyna qatysty, dep habarlaıdy aqshamnews.kz.
Kezdesý barysynda syrtqy saıası vedomstvolardyń basshylary halyqaralyq kún tártibindegi ózekti máseleler boıynsha pikir almasyp, Dostastyq sheńberindegi ózara is-qımyldyń jaı-kúıi men perspektıvalaryn talqylady.
«Búginde Dostastyq pikir almasýdyń, birlesken kúsh-jigerdi úılestirýdiń jáne elderimiz arasyndaǵy keshendi baılanystardy birtindep tereńdetýdiń suranysqa ıe alańy bolyp otyr. Qazaqstan Uıymdy odan ári damytýǵa múddeli jáne onyń kópqyrly áleýetin nyǵaıtýǵa nıetti», – dedi Qazaqstan SİM basshysy.
Sondaı-aq M.Nurtileý qatysýshylardy TMD aıasyndaǵy yntymaqtastyqtyń ártúrli aspektileri boıynsha Qazaqstannyń ustanymdary týraly habardar etip, Uıymdy odan ári damytýǵa baǵyttalǵan birqatar usynystardy ortaǵa saldy.
Uıymnyń ınstıtýsıonaldyq damýyna, úılestirý mehanızmderin jetildirýge jáne Dostastyq aıasynda Qazaqstan Prezıdenti Qasym-Jomart Toqaev usynǵan bastamalardy iske asyrýǵa erekshe nazar aýdaryldy.
Osy turǵyda Qazaqstan bastamalaryn júzege asyrýda Dostastyq boıynsha seriktesterdiń qoldaýy erekshe atalyp ótti. «Elimizdiń usynysy boıynsha búgingi tańda Volontórler forýmy, Dostastyq jármeńkesi, TMD Akademıalyq astanasy jáne basqa da kóptegen jobalar sıaqty aýqymdy is-sharalar birlesken kúsh-jigerdiń arqasynda iske asyrylyp jatyr nemese jaqyn bolashaqta ótkizýge josparlanǵan», – dep málimdedi QR Syrtqy ister mınıstri.
Uly Otan soǵysyndaǵy Jeńistiń 80 jyldyǵy qarsańynda TMD elderiniń birqatar qalasyna, sonyń ishinde Astana, Almaty, Qaraǵandy jáne basqa da qalalarǵa «1941-1945 jj. Eńbek dańqy qalasy» qurmetti ataǵyn berý týraly sheshim kelisildi.
Almatydaǵy otyrys dástúrli dostyq atmosferada ótti. Taraptar Dostastyq aıasyndaǵy yntymaqtastyqty damytýǵa jáne osy Uıymnyń kópqyrly áleýetin odan ári nyǵaıtýǵa beıildiligin rastady.
Syrtqy ister mınıstrleri keńesiniń kelesi otyrysy 2025 jylǵy qazan aıynda TMD Memleket basshylary samıti qarsańynda Dýshanbe qalasynda ótedi.