Bul erekshe mýzeı Yandex Qazaqstan-nyń bastamasymen júzege asyryldy. IT-kompanıasy sıfrlyq tehnologıalardyń evolúsıasyn kórsetetin aqyldy qalalyq keńistik quryp, munda kelýshiler tehnologıalardyń damýy men vıdeo oıyndardyń tarıhymen tanysyp, búgingi kúni olardyń qalaı damyp jatqanyn bile alady, dep habarlaıdy aqshamnews.kz.
Iandeks Mýzeıdegi ekskýrsıalar tegin ótedi.
Mýzeı qonaqtary esepteý tehnıkasynyń evolúsıasynyń negizgi kezeńderin qamtıtyn ınteraktıvti ekspozısıany kóre alady. Mysaly, ár túrli dáýirdegi basty kompúterler — Commodore 64, ZX Spectrum, Atari 65XE, Macintosh Performa 630, IBM PC 300GL, Apple iMac G3 syndy ataqty qurylǵylar, sondaı-aq bala kezden tanys oıyn konsolderi: alǵashqy Sony PlayStation, aty ańyzǵa aınalǵan Sega Mega Drive, Nintendo, arkadalyq avtomattar eń tanymal oıyndarmen jabdyqtalǵan.
Taǵy bir erekshe jaıt! Retro kompúterler men konsolder tolyq jumys istep tur – olardy tegin paıdalana alasyz.
Kompanıa bul Mýzeıdiń IT-ındýstrıasy men zamanaýı ónerge arnalǵan kórmeler men dárister alańy bolatynyn aıtady.
Mýzeıdegi Yandex Qazaqstan tehnologıalary aımaǵy da qyzyqty oryndardyń biri. Munda kelýshiler robot jetkizýshiniń lıdarlyq bultyn kórip, robottyń álemdi qalaı kóretini men zattardy qalaı tanıtynyn tamashalaı alady. Sondaı-aq, vırtýaldy asıstent Alısa ornatylǵan qurylǵylar stendinde onymen qazaq jáne orys tilderinde sóılesýge bolady.
Mýzeıdiń mekenjaıy: Ál-Farabı dańǵyly 11/1.