"Tarıfti ınvestısıalarǵa aıyrbastaý" baǵdarlamasy aıasynda Almatyda elektr jelilerin jańǵyrtý boıynsha jumystar júrgizilýde. Almatynyń óńirlik komýnıkasıalar qyzmeti uıymdastyrǵan brıfıńte QR Ulttyq ekonomıka mınıstrliginiń Tabıǵı monopolıalardy retteý komıtetiniń Almaty qalasy boıynsha departamentiniń basshysy Ásel Býdeneeva sóz sóıledi.
Onyń aıtýynsha, "AJK" AQ 2024 jylǵa josparlanǵan jelilerdi modernızasıalaýǵa 30,5 mlrd teńge baǵyttaıdy, onyń ishinde 1,8 mlrd teńge qosymsha ınvestısıalar bólinedi. Osy sharalar elektr jelileriniń tozýyn 2,45%-ǵa azaıtýǵa múmkindik beredi dep kútilýde. Budan bólek, bul sharalar apattyq jaǵdaılar men normatıvtik tehnıkalyq shyǵyndardy azaıtady.
Sonymen qatar, elektrmen jabdyqtaý tarıfteriniń ózgerýi elektr energıasyn óndirý jáne taratý baǵasyna, ınvestısıalyq quramdas bóliktiń ózgerýine, sondaı-aq ekonomıkalyq kórsetkishterge baılanysty ekeni atap ótildi.
2024 jyldyń 15 qazanynan bastap elektr energıasynyń ortasha baǵasy ózgerip, kelesideı bolmaq:
- halyq úshin QQS-syz 27,59 teńge/kVt saǵ;
- zańdy tulǵalar úshin QQS-syz 30,08 teńge/kVt saǵ;
- búdjettik uıymdar úshin QQS-syz 30,47 teńge/kVt saǵ.
Jeke tulǵalar úshin tarıfter tutyný kólemine baılanysty saralanǵan:
- birinshi deńgeı úshin QQS-syz 25,06 teńge/kVt saǵ;
- ekinshi deńgeı úshin QQS-syz 33,11 teńge/kVt saǵ;
- úshinshi deńgeı úshin QQS-syz 41,39 teńge/kVt saǵ.
Tolyǵyraq aqparatty https://www.esalmaty.kz/ saıtynan qaraýǵa bolady.
Sonymen qatar, Almaty ákimdigi halyqtyń áleýmettik osal toptary úshin tarıfterdiń ósýine baılanysty ótemaqy tólemderin jalǵastyratyny atap ótildi. Joba aıasynda 140 myńnan astam adam aı saıyn 0,8 AEK mólsherinde áleýmettik tólemder aldy. Bul tólemder 2025 jyldyń 1 sáýirine deıin jalǵasady.
Almatyda osy sanatqa kiretin 333 857 azamat bar, olar áleýmettik kómek alý úshin qajetti qujattaryn ákimdikterge tapsyrýy kerek.