Ábilhan Qasteev atyndaǵy QR Memlekettik óner mýzeıinde «Erkin sýretshiler birlestigi» uıymynyń qoldaýymen Latıf Qazbekovtyń «Qaǵaz álemderi» jáne Andreı Bıstıdiń «Temir mysqyl» atty ekspozısıalarynyń vernısajy ótti, dep habarlaıdy aqshamnews.kz.
Kórmege avtorlyq qaǵazdaǵy 111 akvareldi, bederli kompozısıalar men týsh sýretteri, ılústrasıalar, sondaı-aq 40 músin qoıyldy.
Latıf Qazbekov – sýretshi-grafık, Reseıdiń eńbek sińirgen sýretshisi, Reseı sýretshiler odaǵynyń múshesi, Sankt-Peterbýrg qazirgi zamanǵy óner akademıasynyń múshesi. Týǵan jeri Qazaqstan, ol N.V. Gogol atyndaǵy Almaty kórkemóner ýchılıshesin Borıs Petrovıch Pak sheberhanasynda bitirgen. Kóp qabatty qaǵaz jasaýdyń ózindik tehnıkasyn oılap tapty. Sonyń arqasynda árbir paraq akvareldi keskindemede tús pen bederli faktýranyń keremet áserin týdyryp, jalǵyz týyndyǵa aınalady.
Andreı Bıstı – tanymal reseılik grafık, keskindemeshi, músinshi, Máskeý sýretshiler odaǵynyń múshesi. Máskeý polıgrafıa ınstıtýtyn bitirgen, P.G. Zaharovtyń, V.N. Láhovtyń, A.D. Goncharovtyń janynda bilim alǵan. Sýretshiniń shyǵarmashylyǵynyń negizgi sáti eksperımentke degen qyzyǵýshylyq bolyp tabylady.
Kórme 2024 jyldyń 6 qazanyna deıin jalǵasady.