Shyndyǵynda onyń mundaı quqyǵy bolmaǵan.
Almatyda taksı júrgizýshisi jolaýshylardy zańsyz tasymaldaǵan, dep habarlaıdy Almaty-akshamy.kz Polisia.kz-ke silteme jasap.
Túrksib aýdandyq kóshi-qon qyzmetiniń qyzmetkerleri jolaýshylardy zańsyz tasymaldaǵan taksı júrgizýshisin anyqtady.
«Jergilikti is-shara barysynda Seıfýllın dańǵyly men Aımaýytov kóshesiniń qıylysynda tanymal resýrsqa tirkelip, jolaýshylar tasymalymen aınalysqan Ózbekstan Respýblıkasynyń azamaty 27 jastaǵy M. esimdi azamattyń basqarýyndaǵy Chevrolet kóligi toqtatyldy. Shyndyǵynda, onyń mundaı quqyǵy bolmaǵan. Sheteldik azamatqa qatysty QR ÁQBtK-niń 517-baby 5-bóligi boıynsha ákimshilik quqyqbuzýshylyq týraly hattama toltyryldy. İs júrgizý materıaldary sheshim shyǵarý úshin sotqa jiberildi. Sondaı-aq jumys berýshige qatysty ákimshilik yqpal etý sharalary qoldanylyp, oǵan QR ÁQBtK-niń 519-baby 1-bóligimen hattama toltyryldy. Sonymen qatar Almaty qalasy boıynsha Memlekettik kirister departamentine joldaý úshin QR ÁQBtK-niń 613-baby 2-bóligine sáıkes jeke materıal bólindi. Kólik mamandandyrylǵan aıyppul turaǵyna qoıyldy», – dedi Almaty qalalyq PD Kóshi-qon qyzmeti basqarmasynyń bastyǵy Asqat Býtýnchınov. Sondaı-aq Asqat Býtýnchınov Almatyda «Nelegal» is-sharasynyń aıaqtalǵanyn habarlady.
«Segiz kún ishinde kóshi-qon zańnamasyn buzǵany úshin 1229 adam ákimshilik jaýapkershilikke tartyldy, onyń 665-i shetel azamattary. Sot sheshimimen 70 sheteldik QR aýmaǵynan shyǵaryldy. Sonymen qatar sheteldikterdiń elimizde bolýynyń zańdylyǵyn qamtamasyz etý sharalaryn qoldanbaǵany úshin 531 otandasymyz ákimshilik jaýapkershilikke tartyldy. Sheteldik jumys kúshin tartý erejelerin buzǵan 33 jumys berýshige aıyppul salyndy. Qujatsyz júrgen 275 shetel azamaty jeke basyn anyqtaǵanǵa deıin PD-nyń qabyldap-taratý bólimine ornalastyryldy», – dedi Býtýnchınov.