Baýyrlas eldiń mádenı kúnderi Almatydaǵy Abaı alańynda Tájikstannyń aýyl sharýashylyǵy ónimderi men ónerkásip taýarlarynyń kórmesinen bastaldy.
Respýblıka Saraıynyń aldyna ornatylǵan shatyrlarda halyq shyǵarmashylyǵy taýarlary men aýyl sharýashylyǵy ónimderi, onyń ishinde keptirilgen jemister men kókónister, qaýyn-qarbyz sıaqty 200 tonnadan astam ónim usynyldy.
Tájikstan Respýblıkasynyń Mádenıet kúnderi aıasyndaǵy aıtýly sharanyń biri Tájikstan delegasıasynyń Yqylas atyndaǵy halyq mýzykalyq aspaptar mýzeıine sapary boldy. Tájikstan Respýblıkasynyń Qazaqstandaǵy Tótenshe jáne Ókiletti Elshisi Haırýllo Ibodzoda jáne basqa da resmı tulǵalar mýzeıdi tamashalap, tájik halqynyń karnaı, sýrnaı, rýbab, dýtor, tanbýr sıaqty ulttyq aspaptaryn mýzeı qoryna syıǵa tartty.
Mádenı shara qalamyzdaǵy «Alataý» dástúrli óner teatrynda tájik halqynyń ulttyq kıimderi, halyq shyǵarmashylyǵy taýarlary men sýret kórmesine ulasty.
Kórmege Qazaqstan tarapynan Mádenıet jáne sport mınıstri Asqat Oralov, Almaty qalasy ákiminiń orynbasary Arman Qyryqbaev qatysty.
«Alataý» dástúrli óner teatrynda ótken Tájikstan óner sheberleriniń konserti mádenıet kúnderin qorytyndylady. Bul sharaǵa baýyrlas eldiń Mádenıet mınıstri Zýlfıa Davlatzoda, Tájikstan Respýblıkasynyń Qazaqstandaǵy Tótenshe jáne Ókiletti Elshisi Haırýllo Ibodzoda jáne Almatydaǵy Bas konsýly Ravshan Bobohonzoda qatysty.
Konsertte Amırdjon Rýzı, Sharofat Ýsmonzoda, Nozıaı Karomatýllo, Djovıdon Nozım, Sandjar Sangın, Dılorom Sattorı syndy ánshileri án shyrqap, «Zebo», «Gýlrez», «Parastý» bı ansámblderi Tájikstannyń ár oblysyna tán bı ónerlerin ortaǵa saldy. Úndi tilinde shyrqalǵan án men operalyq arıalar kórermenniń ystyq yqylasyna ıe boldy.
Kesh sońynda tájik ónerpazdary qazaqtyń bıin bılep, qazaqsha án salyp, qurmet kórsetti.
