Almatyda Sybaılas jemqorlyqqa qarsy qyzmet pen qala ákimdigi tarapynan sybaılas jemqorlyq táýekelderiniń aldyn alý jáne búdjettik qarajatty basqarýdyń tıimdiligin arttyrý boıynsha júıeli jumys jalǵasýda.
Bul týraly Almaty qalasy boıynsha Sybaılas jemqorlyqqa qarsy is-qımyl agenttiginiń departament basshysy Arman Rahımov óńirlik komýnıkasıalar qyzmetindegi baspasóz konferensıasynda aıtty, dep habarlaıdy aqshamnews.kz.
Mańyzdy sharýanyń biri - ákim Erbolat Dosaevtyń tapsyrmasymen qolǵa alynyp, qala máslıhaty bekitken qala qurylysy reglamenti men qurylysqa baılanysty jańa erejelerdiń kúshine enýi boldy. Bul qujattar ekologıasy jaǵynan qalanyń taza jáne qaýipsiz damýyn qamtamasyz etýge baǵyttalǵan.
«Bul – qalanyń tarıhynda alǵash ret qabyldanyp, 2025 jylǵy 1 naýryzdan bastap kúshine engen resmı qujattar. Olar qurylys salasyndaǵy sybaılas jemqorlyqty joıýǵa baǵyttalǵan», – dedi Arman Rahımov.
Onyń aıtýynsha, jańa normalar qurylystyń tyǵyzdyǵy men bıiktigin, jer ýchaskelerin paıdalanýdy, sondaı-aq jasyl aımaqtar men tabıǵı landshaftardy qorǵaýdy naqty retteıdi. Sıfrlyq quraldar, ınteraktıvti kartalar men avtomattandyrylǵan rásimderdi engizý adamı faktordyń áserin edáýir azaıtýǵa múmkindik beredi.
Arman Rahımovtyń málimetinshe, bıyl 12 nysanǵa qatysty sharalar qabyldanǵan, olardyń ekeýi tolyǵymen nemese ishinara buzylǵan. Bular – qurylys normalaryn buzyp salǵan turǵyn úı keshenderi, klýb úıleri men qonaqúıler.
Sonymen qatar, spıkerdiń aıtýynsha, qalada memlekettik satyp alý rásimderine monıtorıń júrgizý boıynsha belsendi jumys júrgizilýde.
Qalalyq mobıldilik basqarmasy jol jóndeý jumystaryn kelisý algorıtmin engizip, kepildik merzimin ulǵaıtty:
jańa jol qurylysyna — 3 jyldan 7 jylǵa deıin;
ortasha jóndeýge — 3 jyldan 5 jylǵa deıin.
«Mundaı sharalar bizge jobalardy júzege asyrý sapasyn arttyryp qana qoımaı, ashyqtyq pen eseptilik arqyly sybaılas jemqorlyq táýekelderin azaıtýǵa múmkindik beredi», – dep túıindedi vedomstvo basshysy.