Almaty qalasynda sybaılas jemqorlyqqa qarsy sana qalyptastyrý jumystary jalǵasýda.
Almaty qalasy boıynsha Sybaılas jemqorlyqqa qarsy is-qımyl agenttigi departamentiniń basshysy Arman Rahımovtyń aıtýynsha, jyl basynan beri 66 is-shara ótkizilip, 5,5 myńnan astam adam qamtylǵan, dep habarlaıdy aqshamnews.kz.
«Sybaılas jemqorlyqqa qarsy mádenıetti qalyptastyrý — bizdegi basty basymdyqtyń biri. Biz aldyn alý, aǵartý jáne azamattyq jaýapkershilikke erekshe mán beremiz», — dedi ol óńirlik komýnıkasıalar qyzmetindegi baspasóz konferensıasynda.
Memlekettik ınstıtýtttarǵa degen senimdi kúsheıtip, adal ári ádil bolýdyń mańyzyn arttyra túsý úshin, bul máselede «Zań men tártipke» kóbirek arqa súıeý mańyzdy.
Arman Rahımovtyń aıtýynsha, «Sybaılas jemqorlyqqa qarsy volonterlik» jobasy aıasynda Almatyda 262 erikti jumys isteıdi. Olar 34 kezdesý ótkizip, jastardy adaldyqqa, zańǵa baǵynýǵa úndeýde.
«Bul joba jastar arasynda ashyqtyq pen ádilettilik qaǵıdattaryn nasıhattaıtyn tıimdi alańǵa aınaldy», — dep atap ótti ol.
Onyń sózinshe, belsendi azamattardy yntalandyrýǵa erekshe kóńil bólinedi. Bıyl sybaılas jemqorlyq faktileri týraly habarlaǵan eki adam 1,2 mıllıon teńge kóleminde syıaqy alǵan.
«Buǵan beı-jaı qaramaı, osy iske ózinshe úles qosyp júrgenderge alǵysymyz sheksiz. 2024 jyly barlyǵy 9 azamat marapattalyp, olardyń altaýy 5,2 mıllıon teńge kóleminde aqshalaı syıaqy aldy», — dedi departament basshysy.