Almaty qalasynyń Mádenıet basqarmasy megapolıs turǵyndary men qonaqtaryna Qala kúnin atap ótý aıasynda túrli merekelik baǵdarlama ázirlep qoıdy, sonyń ishinde erekshe atap ótýge turarlyǵy «Súıemin seni, Almaty» degen sımvolıkalyq ataýy bar street festival.
Júregi Almaty dep soqqan kimniń bolsyn qala tarıhynan habary bolmaýy múmkin emes. Shahardyń ózine tán atmosferasy, qalyptasý joly bar. Qyzyq ańyzdary da jeterlik. Sondyqtan da festıváldiń negizi qala tarıhyna órilgen. 1940-jyldardan bastap búginge deıin bolǵan jarqyn oqıǵalar, keıipkerler ádemi kórme, qoıylymdar arqyly beriledi.
Turǵyndar men qala qonaqtaryn erekshe kóńil-kúıge bóleý úshin konsertter men bı alańdary da uıymdastyrylǵan.
Abaı atyndaǵy Qazaq Ulttyq opera jáne balet teatrynan bastalyp, Panfılov kóshesin boılaı uıymdastyrylǵan óner bazary Abaı alańynda da jalǵasty. Munda qazaq válsiniń atasy Shámshi Qaldaıaqovtyń týyndylary shyrqalyp, dástúrli ánder oryndaldy.
Sonaý 1969-jyly tusaýy kesilgen «Taqıaly perishte» fılmine arnalǵan burysh ta kóptiń nazaryna erekshe ilindi. Jurt sýretke túsip, sol kezderdi eske alyp jatyr. Munda fılmdi eske salatyn túrli rekvızıtter bar. Tipti Taılaqtyń ózi osynda.
Kóshe sýretshileri men art-bazarlarǵa arnalyp shatyrlar da tigilgen. Al balalarǵa bazarlyq retinde «Aldar Kóse» qoıylymy sahnalandy.