Almatyda Q.I. Sátbaev atyndaǵy Qazaq ulttyq zertteý tehnıkalyq ýnıversıtetinde jańartylǵan stýdenttik jataqhananyń ashylý rásimi ótti. Bul tarıhı ǵımaratta kezinde aty ańyzǵa aınalǵan «Dos-Muqasan» ansambli qurylǵan bolatyn. Qaıta jóndeýden keıin «Dos-Muqasan uıasy» degen ataý ıelenip, stýdentterge jańa baspana ǵana emes, ýnıversıtettiń mádenı murasyn aıshyqtaıtyn orynǵa aınaldy.
Jataqhananyń ashylý saltanatyna Almaty qalasy ákiminiń orynbasary Azamat Qaldybekov, ýnıversıtet rektory men oqytýshy-professorlar quramy, sondaı-aq «Dos-Muqasan» ansambliniń ańyzǵa aınalǵan ókilderi – Dosym Súleev, Murat Qusaıynov, Ulyqpan Sydyqov jáne Meıirbek Moldabekov qatysty.
Búgin Q.I. Sátbaev atyndaǵy Qazaq ulttyq zertteý tehnıkalyq ýnıversıteti úshin tarıhı kún. Jataqhana oqý ornynyń qaramaǵyna qaıtarylyp, paıdalanýǵa tapsyryldy. Bul – Qazaqstan Respýblıkasynyń Prezıdenti Qasym-Jomart Toqaev jarıalaǵan «Zań jáne tártip» qaǵıdatynyń naqty oryndalýynyń aıǵaǵy. Ýnıversıtet basshylyǵyn, ustazdar men stýdentterdi osy qýanyshty oqıǵamen shyn júrekten quttyqtaımyn, – dedi Almaty qalasy ákiminiń orynbasary Azamat Qaldybekov.
Aıta ketsek, birneshe aı buryn jataqhana sot sheshimimen ýnıversıtetke qaıtarylǵan bolatyn. Sot jekeshelendirý boıynsha jasalǵan kelisimderdi zańsyz dep tanyp, ǵımaratty ýnıversıtet qaramaǵyna berý týraly qaýly shyǵardy. Osylaısha, «Dos-Muqasan» atymen baılanysty tarıhı ǵımarat stýdentterge qaıta buıyrdy.
Qazirgi tańda Almatyda 120-dan astam stýdentter úıi paıdalanýǵa berilgen. Sonymen qatar árbir joǵary oqý ornynda stýdentterdiń turmystyq máselelerin sheshýge arnalǵan ahýaldyq ortalyqtar jumys isteıdi.