Almatydaǵy respýblıkalyq Dostyq úıinde jyrshy, ádebıettanýshy ǵalym Uljan Baıbosynovanyń shyǵarmashylyǵyna arnalǵan “Shyǵys órkenıetindegi shaıyrlyq dástúr” atty jyr keshi ótedi, dep habarlaıdy Almaty-akshamy.kz.
2022 jylǵy 25 qarashada saǵat 11.00-de ótetin is-sharanyń maqsaty – qazaq halqynyń ulttyq ónerin dáripteý jáne qazaqstandyq etnostardy ulttyq qundylyqtar aıasynda toptastyrý.
Árbir halyqtyń, ulttyń óneri men mádenıeti, dástúri ýaqyt synynan ótip, jalpy adamzat órkenıetiniń bir bóligine aınalatyny zańdylyq. Sonyń ishinde ásirese dástúrli ónerdiń orny, tarıhı mańyzy erekshe. Qazaq ultynyń tarıhynda ábden somdalǵan, saralanǵan dástúrli ónerdiń bir túri - jyrshylyq pen termeshilik. Jyr aıtý jáne terme oryndaý Qazaqstandaǵy barlyq etnostardyń mádenıetinde tereń oryn alatyny sózsiz.
Halyq murasy bolyp tabylatyn jyr, termelerde sol ulttyń tarıhy, taǵdyry, tulǵalary sóz bolyp, halyqtar men ulttardyń beıbit ómir súrýi, ózara yntymaqta, aýyzbirlikte bolýy syndy gýmanısik ıdeıalar basty motıvke aınalady.
Dóńgelek ústel barysynda Shyǵys órkenıeti jáne dástúrli termeshilik óner týraly keleli oı-pikirler aıtylyp, sanaly ǵumyryn ulttyq ónerdi nasıhattaýǵa, ǵylymı zertteýlerge arnap, jyr, termelerdiń úzdik úlgilerin oryndap júrgen belgili jyrshy, ádebıettanýshy ǵalym Uljan Baıbosynovanyń “Shyǵys órkenıetindegi shaıyrlyq dástúr” atty kitabynyń tanystyrylymy ótedi.
Keshke óner qaıratkerleri, etnomádenı birlestikterdiń ókilderi jáne óner súıer qaýym qatysady. Keshtiń moderatory - Qanseıit Ábdezuly profesor, fılologıa ǵylymdarynyń doktory.