Qalamyzdaǵy 343 myń sýbektiniń 277 myńy ǵana jumys isteıdi.
Bul týraly Almaty qalasy Kásipkerler palatasynyń dırektory Aıtýar Qoshmambetov Óńirlik komýnıkasıalar qyzmeti brıfıńinde aıtty, dep habarlaıdy Almaty-akshamy.kz
Ulttyq palatanyń mindeti – bıznestiń quqyqtary men múddelerin qorǵaý, bıznes jumysy úshin zańnamalyq jáne basqa da retteýshi bastamalardy qalyptastyrý úderisine kásipkerlerdi keńinen qamtýdy jáne tartýdy qamtamasyz etý.
Memleket basshysy Qasym-Jomart Toqaev aıtqandaı: «Qazaqstanda bıznesti aımaqtyq qana emes, sonymen qatar jahandyq deńgeıde damytý úshin zor múmkindikter bar». Biz úshin ınvestısıany ulǵaıtý jáne bıznes ortany jaqsartý óte mańyzdy. Bul baǵytta josparly jumystar júrgizilýde. Osy jumystyń negizgi nátıjelerin aıta keteıin.
«Ulttyq statısıka búrosynyń málimeti boıynsha, tirkelgen SHOK sýbektileriniń sany boıynsha Almaty kósh bastap tur. «Megapolıste 343 myń sýbekti bolsa, onyń 277 myńy ǵana jumys isteıdi. Ótken jylmen salystyrǵanda ósim 30 paıyzdy quraǵan», - dedi Aıtýar Qoshmambetov.
ÓKQ spıkeriniń aıtýynsha, jalpy 2022 jyl otandyq bıznes úshin, ásirese almatylyq kásipkerler úshin ońaı bolǵan joq. Almatyda jyl basynda oryn alǵan qańtar oqıǵasy umytylǵan joq, onyń kásipkerlerge tıgizgen áseri áli de bar.
«Jaǵdaı qalypqa keltirilgennen keıin biz jedel jeli ashyp, bıznestiń qalaı jáne qandaı kólemde zardap shekkeni týraly aqparat jınaýdy bastadyq. 2000-nan astam qońyraý kelip tústi. Almatyda zardap shekken 2 myńǵa jýyq kásipkerlik sýbektisi anyqtaldy. Olardyń esepteýleri boıynsha jalpy shyǵyn kólemi 94,8 mlrd teńgeden asqan», - dep jalǵastyrdy A.Qoshmambetov.
Bıylǵy jyly «Atameken» UKP bastamasymen Memleket basshysy jappaı tártipsizdikter men moraderlikten shaǵyn jáne orta bızneske keltirilgen zalaldy óteý bastamasyn qoldap, nátıjesinde bıznes qaýymdastyqtyń usynystaryn eskeretin mehanızm ázirlendi.
Ótip bara jatqan jyldyń ishinde keltirilgen zalaldy óteý jónindegi komısıanyń 40 otyrysy ótkizilip, «InfoKazakhstan» portalyna túsken barlyq ótinishter qaraldy.
16 mıllıard 189 mıllıon teńgege 1640 ótinim qoldaý tapty. Onyń ishinde «Jańa Alataý» qorynan – 1 294,8 mln teńgege 636 ótinish, búdjet qarajaty esebinen – 14 mlrd 894 mln teńgege 1 004 ótinish.
Almatyda qańtar oqıǵasyna baılanysty zardap shekken SHOB sýbektilerine kómek kórsetýge daıyn Eriktiler reestri quryldy, 1000 adamǵa deıin aýdıtorıasy bar «kushimiz_birlikte» Instagram paraqshasy ashyldy. Instagram jelisindegi «kushimiz_birlikte» paraqshasy arqyly qańtar oqıǵasynan zardap shekken SHOB 9 kásipkerge kómek kórsetildi.
Jalpy alǵanda, qańtar oqıǵasynan 67 iri bıznes sýbektisi zardap shekti, onyń 62-si Almatyǵa tıesili.