18 sáýirde Almaty qalasy áýejaıyndaǵy jelilik polısıa bólimine Lufthansa áýekompanıasynyń “Frankfýrt – Almaty” baǵytyndaǵy reısimen kelgen 43 jastaǵy Germanıa azamaty shaǵymdanyp keldi.
Ol ózin áýejaıdan qonaqúıge qasaqana joǵary baǵamen, ıaǵnı 45 myń teńgege jetkizgen taksı júrgizýshisine qatysty shara qoldanýdy suraǵan. Kólik polıseıleri jedel izdestirý is-sharalaryn júrgizý barysynda Almaty qalasynyń 45 jastaǵy turǵynyn, jeke taksı júrgizýshisin anyqtady, dep habarlaıdy Almaty-akshamy.kz Polisia.kz-ke sillteme jasap
Er adam germanıalyq azamatqa qoǵamdyq oryndarda tıisip, arbap, oǵan taksı qyzmetin usynyp, Almaty qalasynyń halyqaralyq áýejaıynan qaladaǵy Qonaev kóshesinde ornalasqan qonaqúıge aparǵany úshin joǵary tólem alǵan.
Taksı júrgizýshisi keltirgen shyǵyndy ótedi. Quqyq buzýshy QR ÁQBtK-niń 449-babynyń 1-bóligi (qoǵamdyq oryndarda tıisý) boıynsha ákimshilik jaýapkershilikke tartyldy. Germanıalyq azamat kólik polıseılerine joǵary kásibılik tanytqandary jáne qarajatyn keri qaıtaryp alýǵa úles qosqandary úshin alǵysyn aıtty.
Eske sala keteıik, aǵymdaǵy jyldyń basynan beri elimizdiń áýe jáne temirjol kóligi nysandarynda túrli ákimshilik quqyqbuzýshylyqtar úshin 15 970 azamat jaýapqa tartyldy. Onyń ishinde qoǵamdyq oryndarda tıiskeni úshin 880 azamat anyqtalǵan. Onyń 243-i – zańsyz taksı júrgizýshileri.