Almatynyń bas jospary talqylanýda.
Onyń barysynda «Almatybasjospar» ǴZI bas dırektorynyń orynbasary Aınur Sarbaeva qalada jasyl jelekti kóbeıtý kerektigin alǵa tartty, dep habarlaıdy Almaty-akshamy.kz.
Onyń aıtýynsha, ekologıalyq tepe-teńdikti turaqty saqtaý úshin qalalyq ekojúıeni biriktirip, bıoártúrlilikti qamtamasyz etetin qalanyń turaqty «ekologıalyq» qańqasy jasalady. Oǵan jańa rekreasıalyq aımaqtar men qalany taý bókterinen oıpattarǵa deıin kesip ótetin jáne qalanyń tabıǵı jeldenýine jaǵdaı jasaıtyn «jasyl» ózen dálizi kiredi.
Aýanyń jeldetilýi men atmosferadaǵy lastaýshy zattardyń seıilý deńgeıin jaqsartý maqsatynda, aýa aınalymynyń buzylýyna jol bermeý úshin jeldiń baǵytyn eskere otyryp, qalany odan ári damytý jóninde sheshimder qabyldanady. Jel rejımin eskere otyryp, qurylys salýdyń bas josparyna túzetýler engiziletin bolady.
Qalanyń qazirgi jasyl qory (shamamen 26 myń ga) jylyna orta eseppen 1,3 mln tonnaǵa deıin shań jınaıdy, 16 myń tonnaǵa deıin ottegin óndiredi. Osydan mynadaı qorytyndy jasaýǵa bolady – zıandy zattardyń keri áserin azaıtýdyń eń tıimdi sharasy jasyl qordy saqtaý jáne ony odan ári turaqty damytý bolyp tabylady.
Operatorlar (tabıǵatty paıdalanýshy kásiporyndar) Ekologıa kodeksiniń normalary sheńberinde jańa tehnologıalardy, onyń ishinde zamanaýı shań-gazdy tazartý qondyrǵylaryn engizetin bolady.
Belgilengen sanıtarıalyq-gıgıenalyq normalarǵa qol jetkizilmegen jaǵdaıda kásiporyndar Indýstrıalyq aımaqqa nemese Almaty aglomerasıasynyń basqa aýdandaryna kóshiriletin bolady (sanıtarıalyq-qorǵaý aımaqtarynyń belgilengen kólemi saqtalady).
Erekshe qorǵalatyn tabıǵı aýmaqtardy qorǵaý jáne shamadan tys rekreasıalyq júktemeni boldyrmaý úshin olarǵa kóliktiń ekologıalyq taza túrlerimen ǵana kirýge ruqsat etiledi (qazirgi ýaqytta aýystyryp-otyrýǵa arnalǵan turaqtar bar jáne elektr taksıleri jumys isteıdi), qorshaǵan ortaǵa keri áser etetin obektilerdi kóptep salýǵa ruqsat berilmeıdi.
Jańa bas josparda mindetterdi sheshý úshin:
- Negizgi tabıǵı shekaralar boıynsha qala aýmaǵyn ońtústikten soltústikke qaraı kesip ótetin syzyqtyq saıabaq beldeýlerin qurý.
- Aleıalar, býlvarlar, aýqymdy baǵyttaǵy demalys aımaqtary júıesin uıymdastyrý.
- Jańa baqtar, skverler, býlvarlar, aleıalar, sondaı-aq áýe baseınin saýyqtyrýǵa tıimdi áser etetin iri saıabaq keshenderin qurý, sondaı-aq endik ári merıdıandyq baǵyttarda ózara baılanysty saıabaqtar, skverler, býlvarlar, aleıalar jáne basqa da ashyq keńistikter júıesin qurý.
- Qazirgi skverlerdi rekonstrýksıalaý, keńeıtý, abattandyrý jáne qalpyna keltirý, jańa áserli landshafttar qurý kózdelgen.
Sondaı-aq, jańa bas josparda qala mańyndaǵy rekreasıalyq aımaqtarǵa úlken kóńil bólingen.
Qalada shamamen 2,5 mln. jańa aǵashtyń otyrǵyzylýy mańyzdy.
Qalany kógaldandyrý boıynsha belsendi jumys júrgizý Ońtústik astanaǵa Memleket basshysynyń Almatyǵa sapary kezinde atap ótken «baqsha qala» ataǵyn qaıtarýǵa múmkindik bermek.