2023 jyldyń kúzinen bastap sham baǵanasyndaǵy 2000-nan astam lúk aýystyryldy
Almatyda kóshe jaryǵyn urlaý jáne búldirý kóbeıdi. Bul týraly «Almaty Qala Jaryq» MKK habarlady.
Kompanıa basshysynyń orynbasary Vadım Makarovtyń aıtýynsha, qalada syrtqy jaryqtandyrý tirekterindegi tekserý qaraý lúkterin ruqsatsyz bólshekteý jaǵdaıy kúrt ósti.
«Olar sham baǵanasynyń túbindegi metal qaqpaqtar. Bul jerde shamnyń symdary magıstraldyq kabelge qosylady. Lúkter syrtqy jaryqtandyrý jelilerine tehnıkalyq qyzmet kórsetý jáne jóndeý, kabeldi aýystyrý jáne basqa jumystar úshin qajet. Jaqynda biz bireýdiń bul lúkterdi sheship, urlap jatqanyn baıqadyq. Kúzden bastap biz 2000 lúkti aýystyrdyq», - deıdi Vadım Makarov.
Sonymen qatar, «Almaty Qala Jaryq» dereginshe, qaskúnemder syrtqy jaryqtandyrýdy basqarý shkaftaryn jıi buzady. Bul nysandar joǵary kerneýde jáne olarǵa bógde adamdarǵa kirýge qatań tyıym salynady.
«Qaskúnemder syrtqy jaryqtandyrýdy basqarý shkaftaryndaǵy qulyptar men esikterdi syndyryp, avtomatty ajyratqyshtar óshiredi, sonyń kesirine syrtqy jaryqtandyrý tobynda toq bolmaı qalady. Bizdiń brıgadalar shaqyrtýlarǵa shyǵyp, syrtqy jaryqtandyrýdy basqarý shkafyndaǵy symdardyń kesilgenin, ajyratqyshtardyń synǵanyn nemese alynyp tastalǵanyna, basqa jabdyqtardyń urlanǵanyn nemese búlingenin kóredi. Mundaı faktiler, árıne, syrtqy jaryqtandyrýdy qalpyna keltirý úderisin tejeıdi», - deıdi kompanıa ókili.
Sonymenn qatar, «Almaty Qala Jaryq» MKK derekteri boıynsha vandaldar torsherli trotýar shamdaryn da qıratady. Buzaqylar olardy jıi syndyrady, jaryq sónip, qarańǵy bolýmen qatar, mundaı jerlerde jalańash symdar da qaýipti bolady. Kásiporyn qyzmetkerleri birneshe aýdanda zaqym keltirý qıyn torsherli shamdardy ornatýǵa májbúr boldy.
«Almaty Qala Jaryq» kompanıasy beı-jaı qaramaıtyn azamattardan zaqymdalǵan syrtqy jaryqtandyrýdy basqarý shkaftary, torsherli shamdary men tirekterdegi ashyq lúkter anyqtalǵan kezde kompanıanyń dıspecherlik qyzmetine habarlaýdy, al buzaqylyq áreketterge kýá bolǵandardy polısıaǵa qońyraý shalýdy suraıdy.
Kásiporynnyń dıspecherlik pýnktiniń nómirleri: 8(727)3902040; 8(727)3902060, 8(771)718-24-39, 8(771)718-24-56.