Almatyda "Sergek" beınebaqylaý júıesi jańa fýnksıonalmen tolyqty.
Jańa júıe jol qozǵalysy erejelerin saqtaý deńgeıin arttyrý maqsatynda pılottyq rejımde iske qosyldy, dep habarlaıdy aqshamnews.kz Polisia.kz-ke silteme jasap.
Qazirgi ýaqytta ol Sátbaev kóshesiniń boıymen, Dostyq dańǵylynan Ýálıhanov kóshesine deıingi ýchaskede (ońtústik jáne soltústik jaqta) tájirıbe júzinde jumys istep tur. Bul beınebaqylaý júıeleri endi kólikterdiń turaqqa qoıý erejelerin, onyń ishinde ekinshi qatarǵa kólik qoıý sıaqty buzýshylyqtardy da tirkeıtin bolady.
Almaty qalasynyń ákimshilik polısıa basqarmasy jol qozǵalysyna qatysýshylarǵa Qazaqstan Respýblıkasynyń jol qozǵalysy erejelerine (QR JQE) sáıkes kólikterdi durys qoıý tártibin eskertedi. Atap aıtqanda 85-tarmaqqa saı, jol jıegine paralel bir qatarǵa qoıýǵa ruqsat etiledi. Al 87 jáne 88-tarmaqtarǵa sáıkes, kólikti basqa júrgizýshilerdiń qozǵalysyna kedergi keltiretin jerlerde, onyń ishinde kireberister men shyǵaberisterdi, sondaı-aq keptelis týdyrýy múmkin oryndardy jaýyp qoıýǵa tyıym salynady.
Sonymen qatar QR Ákimshilik quqyq buzýshylyq týraly kodeksiniń (ÁQbK) 597-babynyń 3-bóligine sáıkes, jol qozǵalysyna kedergi keltiretin kólik qoıý erejesin buzǵany úshin júrgizýshige 10 AEK mólsherinde aıyppul salynady. Bul shamamen 39 320 teńgeni quraıdy. Eger aıyppul 7 kún ishinde tólense, jeńildik qarastyrylyp, 5 AEK (19 660 teńge) mólsherinde tólenedi. Almaty qalalyq polısıa departamentiniń baspasóz qyzmeti júrgizýshilerdi jol erejelerin qatań saqtaýǵa jáne qaladaǵy kólik qozǵalysyn qaýipsiz ári yńǵaıly etýge shaqyrady.