Almaty qalasyndaǵy Ábilhan Qasteev atyndaǵy QR Memlekettik óner mýzeıinde belgili sáýletker-sýretshi Moljigit Berik Uzaqbaıulynyń «Ushqan uıa» atty jeke shyǵarmashylyq kórmesiniń ashylý saltanaty ótti.
Saltanatty sharada atalǵan mýzeı dırektorynyń orynbasary A.Hojamýratova, ónertanýshy B.Barmanqulova, Qazaqstan Sýretshiler odaǵynyń tóraǵasy Ó.Jubanıazov, t.b áriptesteri kórme ıesine izgi lebizderin arnady.
Este joq eski zamandardan beri adamzatpen birge jasap kele jatqan ejelgi ónerdi baǵalaıtyn jandardyń nazaryna sýretshiniń 80-nen astam keskindemelik, grafıkalyq týyndylarymen qatar, sáýlet ónerindegi nysandar jobalary beınelengen birneshe planshetter usynylady.
Berik Moljigittiń negizgi kásibi sáýletker, biraq keskindeme men grafıka onyń ómirine garmonıa ákeletin, emosıalar men sezimderge erik beretin jan dúnıesiniń bir bóligi boldy. Mysaly, ımandylyq ıirimderine toly "Qaǵba", "Táýáp etý", "Namaz" kartınalary ishki rýhanı áleminen habar berse, «Balalyq», «Ushqan uıa», «Ájemniń beınesi» týyndylary – sýretshiniń kókeıinde qalǵan balalyq shaqtyń bal kúnderi, saǵynǵan saǵym jyldarynyń estelikteri. Kórmeniń «Ushqan uıa» dep atalýy da sodan bolsa kerek.
N.V. Gogol atyndaǵy Almaty kórkemsýret ýchılıshesin, keıin Lenıngradtaǵy KSRO kórkemóner Akademıasynyń I.E. Repın atyndaǵy keskindeme, músin jáne sáýlet óneri ınstıtýtyn támámdaǵan B.Moljigit 40 jylǵa jýyq sáýlet-jobalaý salasynda Qazaqstannyń qalalaryndaǵy kóptegen ásem ǵımarattar jobasynyń avtory bolyp tabylady. Olardyń ishinde Almaty áýejaıyndaǵy jolaýshylarǵa arnalǵan jańa termınal, Taraz qalasyndaǵy Sport saraıy, Astanadaǵy «Kerýen» oıyn-saýyq kesheni, "Dýman" yqshamaýdanyndaǵy 1000 oryndyq mektep, QazUÝ aýmaǵyndaǵy Bilim saǵaty, taǵy basqa nysandar bar.
Moljigit Berik Uzaqbaıuly – Qazaqstannyń kurmetti sáýletshisi, Qazaqstan Respýblıkasynyń Sáýletshiler jáne Sýretshiler odaǵynyń múshesi, Bolgarıa sáýletshiler odaǵy «Altyn kapıtel», XII Dúnıejúzilik sáýletshiler trıennalesi «INTERARCH‑2012» «Altyn medal» marapatynyń ıegeri.
Kórme 2022 jyldyń 20 qańtaryna deıin jalǵasady.