Ulttyq ekonomıka mınıstri Áset Erǵalıev QR Parlamenti Senatynda «Qazaqstan Respýblıkasynyń keıbir zańnamalyq aktilerine kásipkerlik qyzmet salasyndaǵy jańa retteýshilik saıasatty engizý jáne Qazaqstan Respýblıkasy İshki ister organdarynyń jekelegen fýnksıalaryn qaıta bólý máseleleri boıynsha ózgerister men tolyqtyrýlar engizý týraly» zań jobasyn usyndy.
Senat depýtattary atalǵan zań jobasyn maquldady, dep habarlaıdy Almaty-akshamy.kz
«Taza paraqtan» retteýdiń jańa tásilderi memleket pen bıznestiń ózara is-qımylynyń bazalyq qaǵıdattaryn jetildirýdi, «1 in 2 out» qaǵıdatyn engizýdi, mindetti talaptar tizilimin, bıznes eseptiligin avtomattandyrýdy jáne memlekettik baqylaýdy jetildirýdi kózdeıdi», - dedi Senattyń jalpy otyrysynda QR Ulttyq ekonomıka mınıstri Áset Erǵalıev.
Ulttyq ekonomıka mınıstrliginiń basshysy atap ótkendeı, bızneske qoıylatyn artyq jáne tıimsiz talaptardyń ósýin boldyrmaý úshin talaptardy belgileý sharttary zańnamalyq túrde aıqyndalady. «1 in 2 out» qaǵıdatyn engizý memleket jańa talapty engizgen kezde quqyqtyq retteýdiń sol salasynda qoldanylatyn eki talaptyń kúshi joıylatynyn boljaıdy.
Budan basqa, normatıvtik-quqyqtyq aktiler (NQA) men ózge de qujattar túrinde bızneske arnalǵan barlyq talaptardyń tizbesin qamtıtyn biryńǵaı aqparattyq resýrs bolatyn mindetti talaptar tizilimi jasalady. Tizilimde NQA-nyń jańa retteýshilik saıasatqa sáıkestigin qaraý merzimderi aıqyndalady. Sáıkes kelmegen jaǵdaıda quqyqtyq aktiler qaıta qaralady nemese joıylady.
Á.Erǵalıevtiń aıtýynsha, avtomattandyrylý engizilmegen jáne qamtamasyz etilmegen eseptilikti usynýdy talap etýge tyıym salý zań júzinde bekitiledi. Nátıjesinde, eger memlekettik organ eseptilikti balamaly túrde – elektrondyq túrde berý múmkindigin jasamaǵan bolsa, onda ony qaǵaz túrinde berýdi de talap ete almaıdy.
Zań jobasynda memlekettik baqylaý jáne qadaǵalaý júıesin reformalaý engizilgen. Memlekettik baqylaýdyń jańa nysany tekserýden profılaktıkalyq is-sharalarǵa kóshýdi kózdeıdi.
Jobada sondaı-aq ishki ister organdaryn halyqtyń kóshi-qony salasyndaǵy vedomstvoaralyq úılestirýge baılanysty fýnksıalaryn Eńbek jáne halyqty áleýmettik qorǵaý mınıstrligine; qylmystyq-atqarý mekemelerinde ustalatyn adamdardy medısınalyq qamtamasyz etý jónindegi fýnksıalar men ókilettikterdi Densaýlyq saqtaý mınıstrligine; probasıa qyzmetiniń esebinde turǵan adamdarǵa áleýmettik-quqyqtyq kómek kórsetý jónindegi fýnksıalardy jergilikti atqarýshy organdarǵa berý arqyly beıindi emes fýnksıalardan bosatý kózdeledi.
«Kásipkerlik qyzmetti retteýdiń jańa tásilderin iske asyrý bızneske júktemeni túbegeıli azaıtýǵa múmkindik, jańa ekonomıkalyq shyndyq jaǵdaıynda iskerlik belsendilikti iske asyrýǵa serpin beredi», - dedi mınıstr.