Sporttyq básekege áskerı qyzmetshiler qatysty.
Almaty qalasynda Qazaqstan Respýblıkasy Ulttyq ulany «Ońtústik» óńirlik qolbasshylyǵyna qarasty áskerı bólimder arasynda voleıboldan chempıonat ótti, dep habarlaıdy Almaty-akshamy.kz.
Sporttyq básekege Almaty, Shymkent, Qyzylorda, Taraz jáne Taldyqorǵan qalalarynan kelgen toǵyz komanda qatysyp, ózara baq synady. Ár komanda quramynda alty áskerı qyzmetshiden boldy.
Jarystyń shymyldyǵyn túrgen «Ońtústik» óńirlik qolbasshylyǵy qolbasshysynyń orynbasary, polkovnık Konstantın Qýatov alǵy sózinde voleıboldan ózderiniń sheberligin kórsetý úshin ár qaladan kelgen komandalardy quttyqtap, jeńis tuǵyrynan kórinýlerin tiledi.
«Jeke quramnyń sportpen shuǵyldanýyna mol múmkindikter jasalýda. Fızıkalyq dene kúshterin shynyqtyrý óte mańyzdy», - dep atap ótti.
Oıyn óte qyzý tartysty ótti. Ár komanda uıymshyldyqpen ádemi oıyn órnegin kórsetip, qarsylas komandalar voleıbol setkasyna upaı salýmen boldy. Sharshy alańdaǵy tartysty oıyn 6506 áskerı bólimi men 5513 áskerı bólimderinen kelgen komandalar arasynda órbidi.
Alǵashqy mınýttarda Shymkent qalasynyń komandasy shabýyldaryn údetip joıqyn soqqylar jasap, esepti eselep aldy. Upaı sanymen artta qalǵanyn sezgen tarazdyq sportshylar da qarap qalmaı, oıyn tizginin óz ıelikterine alǵan olar qarsylas komandanyń qatelikterin utymdy paıdalanyp upaı sanyn teńestire bildi. Oıyn aıaqtalýyna birer mınýttar qalǵanda qos komandanyń oıynshylary baıraqty básekede baryn saldy. Nátıjesinde shıraq qımyl tanytqan tarazdyqtardyń baǵy janyp, mereıi ústem boldy.
Tartysty ótken jarystyń nátıjesi boıynsha aldyna jan salmaǵan Taraz qalasynan kelgen 5513 áskerı bóliminiń komandasy chempıon atandy. Júldeli ekinshi oryndy Shymkent qalasynyń 6506 áskerı bólimi ıelendi. Al úshinshi oryndy Almaty qalasyndaǵy 5571 áskerı bóliminiń komandasy mise tutty.
Jeńimpazdar «Ońtústik» óńirlik qolbasshylyǵy qolbasshysynyń atynan kýbok, dıplom jáne baǵaly syılyqtarmen marapattaldy. Sonymen qatar oıyn barysynda belsendiligimen kózge túsken Ermek Surabaldınov «Úzdik baılanystyrýshy», Igor Lopatın «Úzdik oıynshy», Janabek Maqshatov «Úzdik shabýylshy», Ernazar Lesbekov «Úzdik qorǵaýshy» nomınasıalaryna ıe boldy.