Almaty polısıasy jol qozǵalysyna qatysýshylarǵa úndeý jasady.
Óıtkeni qalada samokattardyń qatysýymen bolatyn jol-kólik oqıǵalary jıilep ketti. Qala turǵyndarynyń jaıly jáne qaýipsiz ómir súrýiniń mańyzdy faktory – jol qaýipsizdigi. Almaty polısıasy profılaktıkalyq is-sharalardy kúsheıtti, dep habarlaıdy Almaty-akshamy.kz.
Onyń basty maqsaty – oǵan qatysýshylar arasynda jol qozǵalysy qaýipsizdigi talaptarynyń saqtalýyna baqylaýdy kúsheıtý jáne jol-kólik oqıǵalaryn azaıtý.
– Qala turǵyndary arasynda balamaly kólik túrleri, sonyń ishinde samokattar áli de suranysta. Almaty joldarynda olardyń 50 myńnan astamy bar, sáıkesinshe jol-kólik oqıǵasy da kóbeıgen. Jyl basynan beri samokattardyń qatysýymen 38 jol-kólik oqıǵasy tirkelip, 42 adam zardap shekti, abyroı bolǵanda, qaza bolǵandar joq. İshki ister Mınıstrligi qabyldaǵan sharalar samokattardy paıdalaný jaǵdaıyn birshama turaqtandyrýǵa múmkindik berdi: jas shekteýleri belgilendi, qorǵanys quraldaryn mindetti túrde paıdalanýǵa jáne jolaýshylardy tasymaldaýǵa talaptar qoıyldy. Alaıda qaıǵyly oqıǵalar ádi de jalǵasýda. Samokat paıdalanýshylar jol qozǵalysyna qatysýshylardyń osal sanattarynyń biri bolyp tabylady, – dedi Almaty qalalyq PD jergilikti polısıa qyzmeti basqarmasynyń bastyǵy Serik Shýmaev.
Spıkerdiń aıtýynsha balamaly kólik túrlerin júrgizetin adamdardyń QR-nyń jol qozǵalysy erejelerin buzý derekterin anyqtaý boıynsha da jumys kúsheıtilgen. Jyl basynan beri joldyń ortasynda jıi qozǵalatyn, jeke qorǵaný quraldarynyń mindetti bolýy talaptaryn elemeıtin, kámeletke tolmaǵandardyń samokattarmen júrýine jol bergen 7,5 myńnan astam samokat júrgizýshileri ákimshilik jaýapkershilikke tartyldy.
– Men jol qozǵalysyna qatysýshylardy JQE-ni qatań saqtaýǵa shaqyramyn. Ata-analar óz balasynyń qaýipsizdigi úshin tolyq jaýapkershilikti sezinýi kerek. Qylmysqa nemquraıly qaramańyz, balańyzdy qorǵańyz, ózińiz úlgi bolyp olarǵa zańdy qurmetteýdi úıretińiz, – dedi polkovnık Shýmaev.