Áleýmettik jelilerde jasóspirimderdiń elektrosamokatpen ál-Farabı dańǵyly boıymen joǵary jyldamdyqta júıtkip, óz ómiri men ózgelerdiń qaýipsizdigine qater tóndirgen sáti túsirilgen beınejazba tarady.
Atalǵan derekke baılanysty jergilikti polısıa qyzmeti tekseris júrgizip, oqıǵaǵa qatysy bar eki azamatty anyqtap, ustady. Olardyń biri – kámelet jasyna tolmaǵan jasóspirim. Tekserý barysynda eresek azamattyń júrgizýshi kýáligi joq ekeni belgili boldy. Ol jol qozǵalysy erejesin óreskel buzǵany úshin ákimshilik jaýapkershilikke tartyldy. Al jasóspirimniń ata-anasyna qatysty eki quqyqbuzýshylyq – ata-analyq mindetin tıisti deńgeıde oryndamaý jáne balanyń túngi ýaqytta eresekterdiń qaraýynsyz júrýi boıynsha shara qoldanyldy.
- Mundaı áreketterge jol berilmeıdi. Elektrosamokatpen qatty jyldamdyqta júrý – tek óz ómirine ǵana emes, ózgelerge de qaýip tóndiredi. Biz mundaı zańbuzýshylyqtarǵa qatań shara qabyldaımyz. Ata-analardan balalaryna muqıat bolyp, olarǵa kóshede qaýipsiz júris-turys erejelerin túsindirýdi suraımyz, – dedi Almaty qalasy PD jergilikti polısıa qyzmeti basqarmasy bastyǵynyń orynbasary Tımýr Noǵaıbaev.
Polısıa joldyń – joǵary qaýip aımaǵy ekenin eskertip, árbir azamatty qaýipsizdik erejelerin saqtaýǵa shaqyrady.