16–30 tamyz aralyǵynda Shymkent qalasynda nysana kózdeý sportynan ótip jatqan XVI Azıa chempıonatynda Qazaqstan quramasy sátti óner kórsetýde.
Ulttyq qurama 9 medal enshiledi: 2 altyn, 1 kúmis jáne 6 qola, dep habarlaıdy aqshamnews.kz.
Qazaqstanǵa alǵashqy altyndy Islam Satpaev syılady. 10 metrlik pnevmatıkalyq vıntovka jattyǵýynyń fınalynda Almaty qalasynyń ókili, Parıj-2024 Olımpıadasynyń qola júldegeri qytaılyq jáne koreıalyq qarsylastaryn artta qaldyryp, Azıa chempıony atandy.
Jasóspirimder arasyndaǵy «skıt» jattyǵýynda taǵy bir almatylyq sportshy Artóm Sedelnıkov altyn medal ıegeri atandy. Ol sheshýshi synda Úndistan sportshylaryn basyp ozdy.
Buǵan deıin áıelder arasyndaǵy «skıt» jattyǵýynda Anastasıa Molchanova qola júldege qol jetkizse, komandalyq esepte Olga Haılova, Adel Sadaqbaeva jáne Anastasıa Molchanova kúmis júlde ıelendi.
PP-3 jattyǵýynda jasóspirimder komandasy (Kırıll Fedkın, Ramazan Yntyqbaı, Kırıll Sýkanov) qola júldege ıe boldy. Dál osy jattyǵýda jasóspirim qyzdar qurama komandasy (Sáýle Álimbek, Krıstına Ýstınova, Asylym Jaqıa) qola júldeger atandy. Sondaı-aq jastar arasyndaǵy komandalyq PP-3 jattyǵýynda Kıra Vladımırova, Alısa Kradenova jáne Sofá Jýkova qola medal jeńip aldy.
Sonymen qatar, PP-mıks jattyǵýynda jasóspirimder juby Kırıll Fedkın men Sáýle Álimbek el qorjynyna taǵy bir qola júlde qosty. Osy jattyǵýda uldar arasynda Danııl Smırnov pen Alısa Kradenova da qola medal ıelendi.
Aıta keteıik, chempıonatqa 27 elden 800-den astam sportshy qatysýda. Azıa chempıonatynda 700-den astam medal sarapqa salynady.
Jarysty Qazaqstan nysana kózdeý federasıasy QR Týrızm jáne sport mınıstrliginiń qoldaýymen ótkizip jatyr.