Búgin, 29 naýryz Almatydaǵy Ortalyq áskerı sporttyq klýbynda sambodan QR kúshtik qurylymdary arasynda respýblıkalyq ashyq birinshiliktiń fınaldyq kezdesýleri bastaldy.
Bul saıys – elimizdiń qaýipsizdigin qamtamasyz etip júrgen azamattardyń sporttaǵy sheberligin, eptiligi men kúshin synaıtyn doda. Týrnırdiń maqsaty – kúshtik qurylym qyzmetkerleriniń arasynda salaýatty ómir saltyn nasıhattaý jáne patrıottyq rýhty arttyrý.
Aıta keteıik, atalmysh týrnırge elimizdiń ár óńirinen quqyq qorǵaý organdary men áskerı qurylym ókilderi qatysýda. Jarysqa qatysýshylar óz sheberlikterin ortaǵa salyp, sambo kúresiniń tehnıkalaryn joǵary deńgeıde kórsetti. Ásirese, sheshýshi kezdesýler sportsúıer qaýymnyń nazaryn aýdardy.
Respýblıkalyq jarystyń ashylý saltanatyna eldiń joǵary laýazymdy tulǵalary men qoǵam qaıratkerleri qatysty. Qurmetti qonaqtar qatarynda QR Qorǵanys mınıstri, general-polkovnık Rýslan Jaqsylyqov, Qarýly kúshterdiń ardageri, general-polkovnık Sát Toqpaqbaev, QR Parlamenti Májilisiniń depýtattary Ermurat Bapı men Aıdos Sarym, sondaı-aq elimizdiń tanymal sport ardagerleri boldy.
Mundaı iri deńgeıdegi jarys – áskerı qyzmetkerler úshin kásibı daıarlyqpen qatar, rýhanı qundylyqtardy dáripteýdiń de taptyrmas quraly. Shara barysynda sóz alǵan spıkerler jas urpaqqa úlgi bolatyn osyndaı bastamalar jalǵasyn tabýy tıis ekenin atap ótti.
Sambo – tek sport emes, ol – tártip pen tabandylyqty, otansúıgishtikti talap etetin kúres túri. Osy týrnır arqyly uıymdastyrýshylar jas býynǵa patrıottyq tárbıe berýdi, kúshtik qurylym ókilderi arasynda dostyq pen áriptestik baılanysty nyǵaıtýdy kózdep otyr. Bul – el bolashaǵy úshin mańyzdy qadam.
Týrnır aıasynda sportshylardyń moraldyq-psıhologıalyq daıarlyǵyna, komandalyq rýhyna erekshe kóńil bólindi. Mundaı jarystar kúshtik qurylym qyzmetkerleriniń fızıkalyq daıyndyǵyn arttyryp qana qoımaı, olardyń ózara yntymaqtastyǵyn tereńdete túsedi.