Almaty ákiminiń orynbasary Oljas Smaǵulov Saıran kólin qaıta jańǵyrtý jumystarynyń sapasy men belgilengen merzimde oryndalýyn qadaǵalaý maqsatynda nysan basynda kóshpeli keńes ótkizdi. Jıynǵa merdiger mekemeniń, aýdan ákimdikteriniń, komýnaldyq qyzmetterdiń, polısıanyń, TJD jáne ózge de tıisti uıymdardyń ókilderi qatysty.
Oljas Smaǵulov kógaldandyrý, kórkeıtý, ınjenerlik jáne sanıtarlyq ınfraqurylym baǵytyndaǵy atqarylyp jatqan jumystardyń jaı-kúıimen tanysty. Tekserý barysynda oń ózgeristermen qatar, sheshýin kútken túıtkildi máseleler de anyqtaldy.
Aldaǵy kúnderi sýarý júıesin ornatý jumystary aıaqtalyp, merdiger mekeme aýqymdy kógal egý, kópjyldyq butalar men sándik gúlder otyrǵyzý jumystaryna kirisedi.
Sonymen qatar, kórkeıtý aıasynda birqatar mańyzdy is-shara júzege asyrylmaq. Atap aıtqanda, aldaǵy ýaqytta kireberis alańdarǵa tórt pandýs pen jedel saty ornatylady, kespe tas tóseý jumystary aıaqtalyp, kólbeý jerlerdi bekitý, jańbyr sýyn aǵyzý júıesin qurý, aǵashtarǵa jaryq shamdaryn ornatý jáne kóshe shamdaryn ornatý jumystary jalǵasady. Buǵan qosa, qosymsha 130 qoqys jáshigi qoıylyp, tazalyqqa jaýapty qyzmetkerlerdiń sany artady. Sanıtarlyq tártipti buzǵandarǵa aıyppul salynady.
Kól aýmaǵyndaǵy qaýipsizdikti qamtamasyz etý maqsatynda 210 beınebaqylaý kamerasyn ornatylady (qazir 47 kamera jumys istep tur). Bul kameralar TJD júıelerimen biriktirilip, sý aıdynynda bolýy múmkin oqys oqıǵalardy der kezinde tirkeýge múmkindik beredi. Sonymen qatar skeıt-park aýmaǵynda anyqtalǵan aqaýlardy dereý joıý týraly merdiger mekemege tapsyrma berildi.
Injenerlik máselelerge de erekshe mán berildi. Atap aıtqanda, sýmen jabdyqtaý jáne káriz júıesine qosylmaǵan ýchaskelerdi qalpyna keltirip, sanıtarlyq-gıgıenalyq toraptardy (SGT) iske qosý mindeti júkteldi. Qazirgi tańda bes SGT bar, olardyń barlyǵy sanıtarlyq talapqa saı jumys isteýge tıis. Sonymen qatar halyq kóp jınalatyn aımaqtarda qosymsha sanıtarlyq toraptar ornatý múmkindigi qarastyrylyp jatyr.
Jıyn barysynda ıt serýendetýge arnalǵan arnaıy alańdar salý, sanıtarlyq qaýipsizdikti qamtamasyz etý, sondaı-aq túngi ýaqytta polısıa patrýlin kúsheıtý máselesi de talqylandy. Beıbereket saýdaǵa tosqaýyl qoıý, qaldyqty der kezinde jınaý jáne shyǵarý baǵytynda baqylaý sharalary qabyldanady.
Almaty ákiminiń orynbasary Oljas Smaǵulovtyń aıtýynsha, Saıran kólin qaıta jańǵyrtý jumystary zamanaýı jaılylyq, qaýipsizdik jáne turaqtylyq standarttaryna saı júrgizilýge tıis. Shahar turǵyndary úshin qolaıly, kórkem ári fýnksıonaldy demalys ornyna aınalýy kerek. Jaýapty mekemeler júktelgen mindetterdi sapaly ári ýaqytyly oryndap, ózara is-qımyldy úılestirýi qajet.