Saıran aýmaǵynda qoǵamdyq keńistikti lastaýshylardy jaýapkershilikke tartý maqsatynda polısıa qyzmetkerleri men eriktilerden quralǵan monıtorıńtik toptyń qatysýymen reıd uıymdastyryldy.
Bul shara ótken demalys kúnderi uıymdastyrylǵan senbilikten keıin qolǵa alyndy. Eriktiler men eko-belsendiler aýmaqty tazalap bolǵannan keıin de aýmaqqa kelgen keıbir azamattar qoqysty beıbereket tastaǵany anyqtaǵan.
Saıran sý qoımasynyń aınalasy kezeń-kezeńimen abattandyrylyp jatyr. Kól jaǵalaýy búginde qala turǵyndary men qala qonaqtarynyń súıikti demalys ornyna aınaldy. Aıta ketý kerek, Saıran jaǵasyna demalýǵa kúnine shamamen 4 000 adam keledi.
Jaıly ári mádenı orta qalyptastyrý maqsatynda Saıran jaǵalaýynda qoǵamdyq tártipti saqtaý boıynsha kúndelikti tekserister júrgiziletin bolady. Qazirgi tańda abattandyrylǵan aýmaqta 124 qoqys jáshigi men beınebaqylaý kameralary ornatylǵan. Sondaı-aq Saıran aýmaǵynda kún saıyn 40 komýnaldyq qyzmetker jumys isteıdi. Olar táýligine orta eseppen 5 tonna qatty turmystyq qaldyqtardy shyǵarady.
Almalynyń PD ókili Saadýlla Sıazhanov turǵyndarǵa kelesideı úndeý jasady:
"Qurmetti almatylyqtar jáne qalamyzdyń qonaqtary! Saıran kóliniń jaǵajaıyna demalýǵa kelgen barlyq azamattardy qoǵamdyq oryndardyń tazalyǵyn saqtaýǵa jáne qoǵamdyq tártipti buzbaýǵa shaqyramyz. Ákimshilik quqyqbuzýshylyq týraly kodekstiń 505-babyna sáıkes eskertý alǵan nemese quqyq buzǵan tulǵalarǵa 5 AEK mólsherinde aıyppul salynady. Sondaı-aq, jaǵajaı aýmaǵynda saǵat 22:00-den keıin qatty daýysta mýzyka qosýǵa jáne shýlaýǵa qatań tyıym salynady", - dedi polısıa ókili.
Buǵan qosa, quqyq qorǵaý organdarynyń qyzmetkerleri turǵyndarǵa qoǵamdyq oryndarda samokatpen, velosıpedpen júrýge jáne úı janýarlarymen serýendeýge bolmaıtynyn túsindirdi.
Jastar saıasaty shtabynyń ókili Shámshi Qudaıbergen men eriktiler jaǵajaıda demalýshylarǵa turmystyq qaldyqtardy durys tastaý erejelerin túsindirý maqsatyndaǵy reıdke qatarynan úshinshi ret qatysyp keledi.
"Jaǵajaı ashylǵan kúnnen bastap adam sanynyń kúrt artqany baıqalady. Ystyqta adamdar jıi kelip, sýsyn men taǵam qaldyqtaryn kóptep qaldyryp ketedi. Alǵashqy kúni óte kóp qoqys jınaldy. Biz jastarmen, demalýǵa kelgen toptarmen jáne otbasylarmen áńgimelesip, ózinen keıingi oryndy taza qaldyrý kerektigin túsindirdik. Kópshilik bul talapqa túsinistikpen qarap, qoldaý kórsetti. Keıingi kúnderi de túsindirý jumystary jalǵasty. Qazirdiń ózinde qoqys kólemi aıtarlyqtaı azaıdy. Biz jaz boıy tazalyq jumystaryna qatysyp, ózimiz de qajet bolǵan jaǵdaıda qaldyqtardy jınaı beremiz", - dedi ol.