Almatyda AMANAT partıasy qalalyq fılıalynyń uıymdastyrýymen el Prezıdenti Qasym-Jomart Toqaevtyń Joldaýynda jarıalanǵan saıası reformalar baǵdarlamasyn qoldaý úshin mıtıń ótti, dep habarlaıdy Almaty-akshamy.kz.
Mıtıńke AMANAT partıasynyń Atqarýshy hatshysy Asqat Oralov qatysyp, jurtshylyqty Jańa Qazaqstandy birge qurýǵa shaqyrdy.
«Bizdiń baǵytymyz – aıqyn, maqsatymyz – ortaq. Biz – kózi ashyq, kókiregi oıaý azamattardy birlesip jumys isteýge shaqyramyz. Ózge partıalar bılikke jetýdi kózdese, biz eń áýeli Táýelsiz Qazaqstannyń múddesi úshin jumys isteımiz. Ardaqty aǵaıyn, Abaı atamyzdan qalǵan amanat sóz bar: «Birińdi qazaq, biriń dos, kórmeseń istiń bári bos». Sondyqtan, kúshimizdiń birlikte ekenin kórsetip, Jańa Qazaqstandy birge quraıyq! Biz birgemiz!» – dedi Asqat Oralov.
Jıynǵa QR Ulttyq ǵylym akademıasynyń akademıgi Hankeldi Ábjanov qatysyp, qazaqstandyqtardy el Prezıdenti Qasym-Jomart Toqaevtyń Joldaýynda aıtylǵan saıası reformalar baǵdarlamasyn qoldaýǵa shaqyrdy.
«Prezıdentimiz Qasym-Jomart Toqaev júzege asyryp jatqan bastamalar men reformalar QR Konstıtýsıasynda pash etilgen quqyqtyq memleket qurýǵa jol ashatynyna senim mol. Biz saıası modernızasıalaýdyń jańa kezeńine aıaq bastyq. AMANAT partıasynyń dúnıege kelýi - osynyń kórinisi. Táýelsizdik – babalarymyzdyń armany ári amanaty. Al jahandaný tusynda arman men amanat aqıqatqa aınalý úshin eldegi yntymaqtan, kelisimnen, kemel únqatysýdan artyq dúnıe joq», - dedi Hankeldi Ábjanov.