Almatyda atyshýly Igor Dýjnovtyń isi boıynsha aldyn ala sot tyńdalymy bastaldy. Sottalýshy Igor Dýjnov isti alqabılerdiń qaraýynan bas tartty. Al memlekettik aıyptaýshy tutqynnyń ózin otbasymen birge úıden qýyp shyqpaq bolǵan bes adamdy qalaı óltirgenin ashyp aıtyp berdi, dep habarlaıdy Almaty-akshamy.kz KTK arnasyna silteme jasap.
Oqıǵa bolǵan kúni sot oryndaýshysy Ábenov, úıdiń jańa ıesi Turǵanov, advokattyń kómekshisi Sákenov, Bókenovtiń qorǵanshylyq organynyń ókili kýáger retinde Saqova men Bektashuǵly qaqpanyń ashylǵan sátin paıdalanyp, úıdiń aýlasyna kiredi. Bul kezde Dýjnov otbasyn úıden shyǵaratynyn túsinip, olarmen eregese, buryn qurǵan josparyn iske asyrmaq bolady. Dýjnov garajǵa kirip, atý úshin aldyn ala daıyndalǵan 10 patrony bar Vektor-307 karabınin alǵan”, – dedi Qazaqstan Respýblıkasy Bas prokýratýrasy Qylmystyq qýdalaý qyzmetiniń prokýrory Shyńǵysqan Pusyrmanov.
Tergeýde Dýjnovtyń adamdardy qabyrǵaǵa tizilip turýǵa májbúrlegenin, keıin olardy birinen soń biri ata bastaǵanyn anyqtady. Sodan keıin ol syrtqa shyǵyp, polısıaǵa oq jaýdyrdy, biraq olar kóliktiń artyna jasyrynyp úlgergen. Tártip saqshylarynyń biri oq atqan adamdy zalalsyzdandyryp úlgerdi. Dýjnov karabınnen barlyǵy 10 ret oq atsa, onyń toǵyzyn nebári segiz sekýndta atqan.
“Jerde jatqan máıitterdi kórgen Dýjnov óz josparynyń iske asqanyna kóz jetkizedi. Osydan keıin de basqa adamdardy izdeı bastaıdy. Osy kezde aýlaǵa júgirip kirgen Abdýlın Dýjnovtan karabındi tartyp alyp, adamdarǵa oq jaýdyrýyna jol bermegen”, – dedi Qazaqstan Respýblıkasy Bas prokýratýrasy Qylmystyq qýdalaý qyzmetiniń prokýrory Shyńǵysqan Pusyrmanov.
Dýjnovqa birden "Adam óltirý" jáne "Bılik ókiline kúsh qoldaný" baptary boıynsha aıyp taǵylyp otyr. Basty sot otyrysy 29 naýryzǵa belgilengen.