– Memleket basshysynyń kezekti Joldaýynyń mazmuny tereńde jatyr. El ıgiligine baǵyttalǵan bıylǵy basty qujat halyqty bir serpiltip tastady. Eń aldymen elimizde úsh oblystyń qurylýy bárimizdi qýantty. Ásirese, osy aımaqtardyń jurtshylyǵy bul jańalyqty qýana qabyldady. Sondaı-aq Qapshaǵaı qalasyna Qonaevtyń esimin berý de halyqtyń qoldaýyna ıe boldy degen senimdemin.
Dálirek aıtqanda, Prezıdent jurtshylyqtan osyndaı usynys tússe, qoldaıtynyn jetkizdi. Eskeretin jaıt, Memleket basshysy óziniń bir sózinde «muny halyqqa jaǵyný úshin jasap jatqan joqpyn» degen edi. Iaǵnı, bul eldiń saıası ekonomıkalyq jaǵdaıyn órkendetý maqsatynda júzege asyryp jatqanyn tilge tıek etti. Munyń barlyǵy ıgi bastamanyń basy ekenine senimdimin!
Joldaýda qańtar dúrbeleńi máselesi sóz boldy. Qańtar oqıǵasyna bir sheti jastar arasyndaǵy jumyssyzdyqtyń beleń alýy sebep bolǵandaı. Óıtkeni jumyssyzdyq qylmysqa ıtermeleıdi. «Tamaǵy toqtyq, jumysy joqtyq azdyrar adam balasyn» deıdi hakim Abaı. Elimizde sońǵy kezderi bolyp jatqan lańkestik áreketterdiń, túrli zań buzýshylyqtardyń, jastar arasyndaǵy qylmystyń kóbeıýi jumyssyzdyqtan. Sanany turmys bılegen zamanda osy olqylyqtyń orny toltyrylsa ıgi.
Sonymen qatar el halqynyń áleýetin kóterýge baǵyttalǵan bıylǵy joldaýda jańashyldyq, úlken motıvasıa bar der edim. Qujatta adam men onyń múddesine basymdyq berilip tur. Óıtkeni elimizdiń basty baılyǵy – adam. Sondyqtan qazaqstandyqtardyń jaqsy turmysy ǵana emes, sondaı-aq alańsyz bolashaǵy árkez basty orynda. Bul rette Memleket basshysy halyqtyń baqytty bolǵanyn erteń emes, búgin kórgisi keletinin aıtty. Ol óz sózinde «Elimniń amandyǵy men jerimniń tutastyǵynan asqan eshbir qundylyq joq.
Meni eń aldymen halqymnyń bolashaǵy qandaı bolatyny tolǵandyrady» dedi. Bılik halyqqa jaqyndaǵan saıyn eldiń de kóńil-kúıi kóterilip, berekesi arta túsetini anyq. Sóz ben istiń arasynda alshaqtyq bolmaý kerektigin Prezıdent árdaıym eske salyp otyr. Bılik pen halyqtyń arasyn jaqyndatýǵa kóp kóńil bóledi. Álemdegi turaqsyzdyq pen halyqaralyq shıelenis jaılaǵan osynaý almaǵaıyp ýaqytta el halqy kúsh-jigerin biriktirýi qajet.