7 qyrkúıek kúni Almaty qalasynda saıası qýǵyn-súrgin qurbandaryn aqtaý jónindegi qalalyq komısıanyń qatysýymen 372 kóterilistiń zertteý jumysy aıasynda aqparat pen tájirıbe almasýǵa arnalǵan óńirlik semınar ótkizildi. İs-sharany respýblıkalyq jobalyq keńse men Almaty qalasy ákimdigi birlese uıymdastyrdy, dep habarlaıdy almaty-akshamy.kz
Semınardyń basty maqsaty – saıası qýǵyn-súrgin qurbandaryn aqtaý úrdisimen baılanysty tájirıbe, ádis-tásilder almasý, zertteýdiń syndarly baǵyttaryn anyqtaý jáne qýǵyn-súrgin qurbandary esimderiniń bazasyn odan ári tolyqtyrý máselelerin talqylaý.
Semınardy moderator – Saıası qýǵyn-súrgin qurbandaryn aqtaý jónindegi respýblıkalyq jobalyq keńseniń tóraǵasy Sabyr Qasymov ashyp, memlekettik komısıa jumysynyń qazirgi is-áreketteri men basymdyqtary týraly aıtyp berdi.
Almaty qalasy ákiminiń orynbasary Erjan Babaqumarov óz sózinde QR Prezıdentiniń 2020 jylǵy 24 qarashadaǵy Jarlyǵymen qurylǵan komısıa jumysynyń qoǵamdyq mańyzdylyǵyn atap ótti. Komısıanyń aldynda saıası qýǵyn-súrgin kezeńindegi oqıǵalarǵa ádil baǵa berý, repressıa qurbandaryn aqtaý jáne qýdalaýǵa ushyraǵan adamdardyń esimderin anyqtaý jóninde naqty quqyqtyq baza qalyptastyrý mindeti tur. Qalalyq komısıa búginde Almaty qalasy polısıa departamentiniń arnaıy muraǵatynda, Almaty qalasynyń ortalyq memlekettik muraǵatynda, "Qazaqstan Respýblıkasy Prezıdentiniń muraǵaty" MM-de saqtalǵan muraǵattyq qujattar men tergeý isterin zerdeleýde. Qazaqstan aýmaǵynda bolǵan iri kóterilisterge qatysýshylar týraly tolyq aqparat jınaý boıynsha keshendi jumystar júrgizilýde.
Respýblıkalyq deńgeıde júrgizilip jatqan jumystar týraly Memlekettik komısıa jumys tobynyń jetekshisi, tarıh ǵylymdarynyń doktory, profesor, QR UǴA qurmetti akademıgi Talas Omarbekov aıtyp berdi. Sondaı-aq, semınar jumysyna Almaty, Jambyl, Qyzylorda, Túrkistan oblystary men Shymkent qalasynyń óńirlik komısıalarynyń ókilderi qatysyp, esepti kezeńdegi zertteý jumystarymen bólisti.
Semınar sońynda qatysýshylar zertteý jumystaryn jaqsartý boıynsha birqatar usynystar qabyldady.
QR Ulttyq kitaphanasynda «372 kóterilisti basý barysynda sotsyz jáne tergeýsiz atylǵan, sondaı-aq osy narazylyqtarǵa qatysyp, qoldaǵany úshin sottan tys jáne sot organdarymen qýǵyn-súrginderge ushyraǵan qurbandary týraly aqparat pen jumys tájirıbesimen almasý týraly» atty dóńgelek ústel ótti. Onda Almaty, Shymkent qalalary men Almaty, Jambyl, Qyzylorda men Túrkistan oblystarynyń óńirlik komısıa músheleri sóz sóılep, jumys nátıjelerimen bólisti. Almaty boıynsha saıası qýǵyn-súrgin qurbandaryn aqtaý jónindegi qalalyq komısıanyń tóraǵasy Erjan Babaqumarov Almatylyq komısıa óz deńgeıinde jumys atqaryp jatqanyn, mundaı bastamalar qoǵamda qoldaý tapqanyn atap ótti.