Táýelsizdiktiń 30 jyldyǵyna arnalǵan sharalar oqý oryndarynda bastaý aldy
Almaty mektepteri men joǵary oqý oryndarynda Táýelsizdiktiń 30 jyldyǵyna arnalǵan ashyq sabaqtar ótkizile bastady, dep habarlaıdy Almaty-akshamy.kz QazAqparat saıtyna silteme jasap.
Bir aı boıy respýblıkanyń barlyq mektepterinde Táýelsizdiktiń 30 jyldyǵyna arnalǵan synyp saǵattary men ashyq sabaqtar ótkiziledi. Urpaq sanasyna qasterli táýelsizdik jyldarynyń qasıetin uǵyndyratyn joba Almaty qalasyndaǵy mektepter men JOO-da da bastaý aldy.
Bostandyq aýdanyna qarasty M.Maqataev atyndaǵy №140-mektep-gımnazıasynda «Táýelsizdik jetistikteri» atty synyp saǵaty ótti. Ashyq tárbıe saǵatynyń maqsaty – bilim men tárbıe berý, oqýshylarǵa 30 jylda elimiz jetken 30 jetistikti nasıhattaý.
Bostandyq aýdandyq bilim bóliminiń basshysy Baqytbek Bostandyqulynyń aıtýynsha, el Táýelsizdiginiń 30 jyldyǵyna baılanysty mundaı is-sharalar qaladaǵy ár mektep pen balabaqshada oqý jylynyń aıaǵyna deıin uıymdastyrylady.
«Jyldyń sońyna deıin ótetin is-sharanyń M.Maqataev atyndaǵy mektep-gımnazıasynda bastalýynyń ózi teginnen-tegin emes. Bıyl aqıyq aqyn M.Maqataevtyń týǵanyna 90 jyl tolyp otyr ári bul mektep – qaladaǵy eń úzdik mektepterdiń biri. Soǵan baılanysty taǵylymdy sharalardy biz osy mektepten bastaǵandy jón kórdik», – dedi Baqytbek Bostandyquly.
Joǵary oqý oryndary stýdentteriniń arasynda da Táýelsizdik uǵymy nasıhattalyp, onyń tarıhı alǵysharttary men saıası kórinisi túsindirildi. Mysaly, S.J.Asfendıarov atyndaǵy Qazaq ulttyq medısına ýnıversıtetiniń qabyrǵasynda «Táýelsizdik jyldaryndaǵy egemendi elimizdiń jáne S.J.Asfendıarov atyndaǵy QazUMÝ-dyń tuǵyrly jetistikteri» atty merekelik shara ótti.
«Bul sharany Táýelsizdigimizdiń 30 jyldyq mereıtoıy qarsańynda uıymdastyryp otyrmyz. Otyz jyl tarıh keńistiginde az ba, kóp pe degen suraq týyndaıdy. Meniń oıymsha, másele ýaqyttyń uzaqtyǵynda emes, osy jyl ishinde atqarylǵan jumystardyń nátıjeliliginde. Otyz jylda elimizde eleýli tarıhı ózgerister oryn aldy. Saıası arenada bolsyn, ekonomıkalyq turǵydan bolsyn Qazaqstan óz atyn shyǵaryp, ómirlik mańyzy bar barlyq salalarda damydy. Sonyń ishinde bilim salasynda talaı reformalar júrgizilip, joǵary oqý oryndarynda bilim berýdiń jańa júıeleri engizildi. Oǵan bizdiń ýnıversıtettegi ózgerister dálel. Qazir biz elimizdegi medısınalyq ýnıversıtetter arasynda QS reıtıńine engen jalǵyz oqý ornymyz», - dedi S.J.Asfendıarov atyndaǵy QazUMÝ prorektory Ýbaıdýlla Mahambetuly.
Jalpy, jyl boıy Táýelsizdiktiń 30 jyldyǵy respýblıka boıynsha barlyq mektepter men joǵary oqý oryndarynda keńinen atalyp ótpek.