Qyzdar 10, 11 jáne 14 jasta
Almatyda 4 qazan sabaqqa ketip, sodan beri habarsyz qalǵan tórt qyz tabyldy, dep habarlaıdy Almaty-akshamy.kz QazAqparatqa silteme jasap.
Bul týraly joǵalǵandardy izdeýmen aınalysatyn «Lıder» volonterler toby málim etti.
Olardyń aıtýynsha, tórt jetkinshekti izdeý jumysy keshe tańǵy úshke deıin jalǵasqan. Qyzdar 10, 11 jáne 14 jasta. Onyń ekeýi - apaly-sińlili baýyrlar.
Eriktiler Naýryzbaı aýdany polısıa qyzmetkerlerimen birlesip, «Alma sıtı» turǵyn úı kesheni men Abaı aýyly tóńiregin súzip shyqqan. Óıtkeni joǵalǵan qyzdardyń telefony shamamen osy aımaqtarda qosylyp-sóndirilgen.
İzdeý jumysy sonymen qatar Taraz qalasynda da júrdi. Onda eriktiler qalaaralyq tasymalmen aınalysatyn avtobýstardy toqtatyp, teksergen. Qyzdar basqa qalaǵa ketip qaldy ma degen kúdik bolǵan.
Úshten keıin qyzdar tabylmaǵan soń eriktiler úıge qaıtqan.
Tańǵy altyda naýryzbaılyq polıseılerdiń qyzdardy aman-esen taýyp, polısıa basqarmasyna jetkizgeni belgili boldy.