Qazaqstannyń birinshi, álemniń 26-raketkasy Elena Rybakına Ostrava (Chehıa) WTA 500 týrnıriniń shırek fınalyna shyqty, dep habarlaıdy Almaty-akshamy.kz QazAqparatqa silteme jasap.
Qazaqstandyq tenısshi ekinshi aınalymda álemniń 31-raketkasy, Belarýs ókili Aleksandra Sasnovıchpen kezdesti.
Osydan bir jyl buryn E.Rybakına A.Sasnovıchti eki ret utqan edi.
Bul joly birinshi partıada esep 2:1 bolǵan mezette qazaqstandyq sportshy breık jasaǵanymen, qarsylasy sol boıda ese qaıyrdy.
Taı-breıkte Elena 3:0 esebimen alǵa shyqqanymen, sol basymdylyǵyn saqtaı almady – 6:7 (5:7).
Ekinshi sette qazaqstandyq sportshy 3:1 esebimen alǵa ketti. Osy basymdylyǵynan aıyryla qoıǵan joq – 6:4.
Úshinshi, sheshýshi partıada esep 4:3 bolǵanda, Sasnovıch breık jasap ketti – 5:3. Degenmen ol machqa dop bergende, Rybakına qaıyra breık jasaı aldy.
Sodan keıin jeńistik bergen joq – 7:5.
Eki saǵat 32 mınýtqa sozylǵan tartysty machta Rybakına 7 eıs jasap, 9 breık-poınttyń tórteýin paıdalandy.
E.Rybakına jartylaı fınalǵa shyǵý úshin álemniń 20-raketkasy, chehıalyq Petra Kvıtovamen talasady.
Ol ekinshi aınalymda álemniń 4-inshi, osy jarystyń 2-raketkasy, ıspanıalyq Paýla Badosany tize búktirdi – 7:6 (7:4), 6:4.
Eske sala keteıik, budan buryn álemniń tórtinshi raketkasy Qazaqstannyń tenıs týrnırlerin joǵary deńgeıde uıymdastyratynyn aıtqanyn, Astana Open ATP 500 týrnırinde qazaqstandyq juptyń shırek fınalǵa shyǵa almaǵanyn jazǵan bolatynbyz.
Sondaı-aq Anna Danılına Chehıadaǵy týrnırdiń jartylaı fınalyna shyqty.