Almatyda ortasha jóndeý jumystary aıaqtalyp, Rysqulov dańǵylynyń ońtústik jaǵynda qozǵalys ashyldy. Esterińizge sala keteıik, jóndeý jumystary 11 tamyzdan bastap Rysqulov-Kýderın jolaıyryǵy kópirinen Rysqulov-Bókeıhanov jolaıyryǵyna deıingi ýchaskede júrgizildi, dep habarlaıdy aqshamnews.kz
Qalalyq mobıldilik basqarmasynyń habarlaýynsha, sońǵy ret atalǵan ýchaskede jóndeý jumystary 2014 jyly, ıaǵnı 10 jyl buryn Almatynyń jol-klımattyq aımaǵyn eskere otyryp, 5 jyldyq normatıvpen júrgizilgen.
Sondaı-aq, búgingi kúni Momyshuly kóshesiniń aýmaǵyn ortasha jóndeý jumystary jalǵasýda. Jumys 16 tamyzda saǵat 11.00-ge deıin jalǵasady.
Buǵan qosa, erteńnen bastap 15 tamyz saǵat 20.00-ge deıin jóndeý jumystaryna baılanysty Sátbaev kóshesiniń Dostyq dańǵylynan Lýganskıı kóshesine deıingi ýchaskesinde qozǵalys jabylady.
Aıta ketý kerek, 20 magıstraldyq kósheni jóndeý kezinde jol tóseminiń beriktigin arttyrýǵa baǵyttalǵan polımerasfaltobeton qoldanylady. Jóndelgen aýmaqtar 36 saǵat boıy tıisti talapqa saı salqyndap, qatýy kerek.
Qala ákimi Erbolat Dosaevtyń tapsyrmasymen magıstraldyq kóshelerdi jóndeý tamyz aıynyń sońyna deıin, aýdandyq mańyzy bar kóshelerdi jóndeý qazan aıynyń sońyna deıin aıaqtalady.
Eske sala keteıik, qozǵalysty shekteýge qatysty barlyq aqparat Almaty.kz saıtynda, @AlmatyJoly Telegram arnasynda, aýdandyq ákimdikter men basqarmalardyń áleýmettik jelilerinde, sondaı-aq 2GIS jáne «Iandeks kartalary» servısterinde jazylǵan.