Bul týraly Mádenıet jáne sport mınıstri Asqat Oralov facebook paraqshasynda jazdy.
Tanymal sportshylardy tárbıelegen oqý orny byltyr jabylyp qalǵan, dep habarlaıdy Almaty-akshamy.kz
«Mınıstrlikke kelip túsken túıtkildi máselelerdi saralap, sheshý joldaryn qarastyryp jatyrmyn. Solardyń ishinde mańyzdysy – Almatydaǵy «Respýblıkalyq sport koleji» janyndaǵy mektep-ınternattyń jumysyn qaıta jandandyrýǵa qatysty ata-analar men ustazdar tarapynan túsken ótinishter. Byltyr atalǵan oqý orny jabylyp, daryndy oqýshylar, jattyqtyrýshylar men ustazdar basqa bilim berý uıymdaryna jiberilgen edi. Máseleni birden tikeleı óz baqylaýyma aldym», – dep jazdy mınıstr.
Bul oqý ornynan Dáýlet Turlyhanov, Olga Shıshıgına, Islam Baıramýkov pen basqa da ataqty sportshylar túlep ushqan edi. Mınıstrdiń aıtýynsha, sol sebepten bul mekteptiń bazasy myqty, oqytýshylary áli de kóptegen talantty sportshylardy daıyndaıtyn bolady. Sondyqtan mektepti jabý týraly sheshim qaıta qarastyryldy.
Mınıstrlik lısenzıany qaıtarý boıynsha aýqymdy jumys júrgizdi. Búginde bilim ordasy oqýǵa qujattar qabyldaýdy bastap ketti. Mektepke júzdegen bala qabyldanyp, ondaǵan kásibı oqytýshy men jattyqtyrýshy jumyspen qamtylady. Internattyń daıyndyq jumystaryn kórip, oqý kabınetteriniń jabdyqtalýyn, kitaptarmen qamtylýyn, jataqhanadaǵy oryndardyń jaı-kúıimen tanysý úshin arnaıy bardym. Sonymen birge, muǵalimderdiń tizimi, sabaq kestesi men kún tártibi bekitildi.
Mınıstr búginde Memleket basshysy balalar sportyn damytýǵa aıryqsha nazar aýdaryp otyrǵanyn, Mádenıet jáne sport mınıstrligi sportpen aınalysqysy keletin balalardy jolda qaldyrmaı, olarǵa qolda bar jaǵdaıdy jasaýdy eshqashan nazardan tys qalmaıtynyn atap ótti.
«Bolashaq búginnen bastalatynyn eskersek, el mereıin asyrar erteńgi chempıondarymyzǵa qajetti jaǵdaıdy dál qazir jasaýǵa tıispiz», – dea jazdy ol.