Almatydaǵy Respýblıka saraıynda Respýblıka kúnine arnalǵan saltanatty konsert uıymdastyryldy. Merekelik keshtiń shymyldyǵy Memlekettik Týdy sahnaǵa ákelip, Qazaqstan Respýblıkasynyń Memlekettik Ánuranyn halyq artısi Talǵat Kúzembaevtyń oryndaýynan bastaldy.
İs-sharaǵa Almaty qalasynyń ákimi Darhan Satybaldy, qoǵam jáne mádenıet qaıratkerleri, máslıhat depýtattary, zıaly qaýym ókilderi men jastar qatysty.
Konsertke Ramazan Stamǵazy, Lýına, Álibek Dinishev, Qazybek Quraıysh, Nurlan Ónerbaev, Janar Duǵalova, Jubanysh Jeksenuly, Mıras Júginisov, sondaı-aq «Dos-Muqasan» ansambli men jas daryn Ádil Bektursyn qatysyp, kórermenge áserli kesh syılady. İs-shara barysynda zamanaýı estradalyq týyndylar men halyqtyq-patrıottyq ánder shyrqalyp, Otan men týǵan jerge degen súıispenshilikti pash etti. Keshtiń sánin keltirgen horeografıalyq qoıylymdar men plasıkalyq bı kórinisterin Wake Up balet toby daıyndady.
Konserttiń eń erekshe sáti – zamanaýı tehnologıa men ónerdiń toǵysýy boldy. Keıbir mýzykalyq óńdeýler men vızýaldy sheshimder jasandy ıntellekt negizindegi otandyq Higgsfield platformasynyń kómegimen ázirlendi. Shyǵarmashylyq salaǵa ınovasıalyq sheshimder engizý Prezıdent Qasym-Jomart Toqaev belgilegen baǵyttyń aıqyn kórinisi. Jasandy ıntellekt pen sıfrlyq tehnologıany damytý – ulttyq básekege qabilettilikti arttyrýdyń mańyzdy tetigi.
Kesh sońynda «Atameken» áni shyrqalyp, jınalǵandardy maqtanysh sezimi kernedi.
Almaty qalasy ákimdiginiń uıymdastyrýymen ótken bul merekelik kesh Respýblıka kúnine arnalǵan negizgi oqıǵa edi, ult birligi men rýhanı sabaqtastyqtyń, sondaı-aq almatylyqtardyń beıbitshilik pen órkendeýge degen talpynysynyń aıqyn kórinisine aınaldy.
Aıta keteıik, búgin Almatyda elimizdiń basty merekeleriniń biri – Respýblıka kúni keńinen atalyp ótip jatyr. Mereke qarsańynda saltanatty marapattaý rásimi ótip, qala ákimi Darhan Satybaldy Memleket basshysy Qasym-Jomart Toqaevtyń atynan shahar turǵyndaryna qoǵam, mádenıet, ǵylym, densaýlyq saqtaý jáne ekonomıka salalaryndaǵy eleýli eńbekteri úshin memlekettik nagradalar tabystady. Qala boıynsha túrli konsertter, kórmeler men sporttyq sharalar uıymdastyrylyp, árbir jannyń júreginde bir ǵana sezim mazdady. Ol táýelsiz elimizge degen sheksiz súıispenshilik!