Túrksíb audanynda Respublıka kúníne oraı merekelík ís-shara ūıymdastyryldy. Saltanatty kontserttí tamashalauǵa audan tūrǵyndary men qala qonaqtary kóptep jınaldy. Shara bastalmaı tūryp memlekettík Tu saltanatty túrde kírgízílíp, Qazaqstan Respublıkasynyń Ánūrany oryndaldy. Būl sát jınalǵan jūrtqa erekshe ruh pen patrıottyq sezím syılady.
Ís-shara barysynda Túrksíb audany ákímíníń orynbasary Ermek Aıtbaıūly qūttyqtau sóz sóılep, jūrtshylyqty merekemen shyn júrekten qūttyqtady.
"Qūrmettí tūrǵyndar men qonaqtar! Barshańyzdy egemen elímízdíń Táuelsízdígíne 35 jyl toluyna oraı atap ótíletín Respublıka kúnímen shyn júrekten qūttyqtaımyn. Būl kún - elímízdíń eń basty merekeleríníń bírí. Elímíz máńgílík bolyp, tuymyz bıíkte samǵaı bersín!" -dedí ol óz sózínde.
Merekelík shara barysynda audannyń belsendí azamattary men qoǵamdyq ómírge úles qosqan tūrǵyndarǵa audan ákímíníń Alǵys hattary tabystaldy. Kontserttík baǵdarlamada patrıottyq ánder shyrqalyp, bı jáne teatrlandyrylǵan kóríníster qoıyldy. Ásírese eltańba men ūlttyq rámízderdí qūrmetteu turaly qoıylym kórermenge erekshe áser qaldyrdy.
"Búgíngí merekelík shara kóńílímízge erekshe quanysh syılady. Ánūran oryndalyp, Tu kóterílgen sátte boıymdy maqtanysh sezímí kernedí. Osyndaı sátterde óz elímníń azamaty ekeníme shyn mánínde rıza bolamyn. Respublıka kúní - táuelsíz elímízdíń tarıhyndaǵy eń mańyzdy merekelerdíń bírí. Búgín kíshkentaı qyzymdy da ertíp keldím. Oǵan da kíshkentaıynan elín, jerín súyudí úıretkím keledí. Balalar osyndaı merekelerdí kóríp ósse, júregínde Otanǵa degen qūrmet pen súıíspenshílík qalyptasady dep senemín. Mūndaı sharalar halyqty bíríktíríp, ūlttyq ruhty kóteredí. Elímíz aman bolyp, osyndaı merekeler jyl saıyn keń kólemde atalyp óte bersín!" - dedí Túrksíb audany tūrǵyny Aqzer Orynbasar.