Búgin túngi saǵat úshte Alataý aýdanyndaǵy «Baqorda» bazarynyń aýmaǵynda ornalasqan qurylys satatyn saýda núktesi órtendi, dep habarlaıdy Almaty-akshamy.kz Inform.kz-ke silteme jasap.
Almaty qalalyq Tótenshe jaǵdaılar departamentiniń málimetinshe, túngi 03:10 shamasynda órt sóndirý brıgadasy «Baqorda» bazary aýmaǵynda ornalasqan qurylys zattaryn satatyn saýda ornyna joǵary rang boıynsha shyqty.
«Oqıǵa ornyna 8 mınýtta kelgen órt sóndirýshiler shatyr astyna qatarlap kesilgen aǵash materıaldarynyń ashyq jalynmen janyp jatqanyn anyqtady. Qyzyl jalyn «Baqorda» saýda ortalyǵyna taralý qaýpi týyndady. Dereý órt ornynda jedel shtabtyń jumysy bastaldy, ónimdiligi joǵary órt oqpandary engizildi, órt avtopoezi iske qosylyp, sondaı - aq úıindilerdi alyp tastaý úshin qutqarý qyzmetiniń aýyr-shynjyr tabandy tehnıkasy tartyldy»,- dep habaprlady departamentten.
Qabyldanǵan jedel sharalarmen qyzyl jalyn bir saǵat ishinde oqshaýlanyp, jalpy aýdany 2 myń sharshy metrdi sharpyǵan órt tańǵy 06:35-te tolyǵymen sóndirildi. Órtti sóndirýge 21 birlik tehnıka men jeke quramnan 64 adam jumyldyryldy. Qaza bolǵandar men zardap shekkender joq. Órttiń shyǵý sebebi anyqtalýda.