Bıyldan bastap el ishinde saıahattaıtyn qazaqstandyqtarǵa tıimdi jeńildik berildi. Balalar ushaqpen tegin usha alady. Shyǵyndy memleket óteıdi. Baǵdarlamanyń negizgi maqsaty – ishki týrızmdi damytý.Almaty.tv jazǵy ýaqytta joǵary suranysqa ıe bolatyn Kids go free baǵdarlamasynyń negizgi sharttaryn usynady, dep habarlaıdy Almaty-akshamy.kz.
Tegin ushatyn bala 2-17 jasta bolý kerek
Baǵdarlama bıyl 1 qańtardan bastap iske qosyldy. Oǵan sáıkes, kámelet jasqa tolmaǵan balalardy ushaqpen tegin tasymaldaý mindeti engizilip otyr. Ol úshin Qazaqstandaǵy resmı týroperatordan el ishinde demalýǵa arnalǵan týrısik paket satyp alý qajet.
Kids go free-diń negizgi talaptaryna sáıkes, tegin ushatyn bala 2-17 jas aralyǵynda jáne Qazaqstan azamaty bolýy shart. Kámelet jasqa tolmaǵan jolaýshynyń qasynda ata-anasy nemese jaqyn týystary (atasy/ájesi, aǵasy/apasy) júrýge tıis.
Respýblıka boıynsha kez kelgen jerge ushyp barýǵa bolady. Týroperator óz aqshasyna balalardyń áýe bıletin satyp alady, artynan kompanıanyń shyǵyny memleket tarapynan óteledi.
Baǵdarlamaǵa qatysý úshin qujat tapsyrýdyń qajeti joq. Tártibi:
el ishinde demalysty josparlap, naqty baratyn jerdi anyqtaý;
sol jerde demalysty uıymdastyra alatyn týrısik kompanıaǵa baryp, týrısik paketti jasaý;
balalardyń áýe bıletterin shegerip, týrısik paketti tóleý;
saıahatqa shyǵý;
demalystan keıin týrısik kompanıaǵa ushaqta berilgen jolaýshylar talonyn usyný.
Qazirgi kezde 19 týrısik kompanıa Kids go free baǵdarlamasyna qosyldy. Olar balalar bıletiniń aqshasyn "Kazakh Tourism" ulttyq kompanıasynan alady.
Jyl basynan beri qansha bala tegin ushty?
Resmı málimetke sáıkes, osy ýaqytqa deıin 153 ótinish boıynsha 14,1 mıllıona teńge kóleminde tólem jasaldy. Osylaısha, 307 bala otbasymen birge demalatyn jerge tegin ushyp bardy.
Búginde Kids go free baǵdarlamasy boıynsha Túrkistanǵa ushatyn otbasylar kóp. Odan keıingi orynda Almaty jáne Mańǵystaý tur. Baǵdarlama aıasynda satyp alynatyn týrısik pakettiń ortasha baǵasy - 320 myń teńge. Eń arzan týr Almaty qalasyna 82 myń teńgege satyldy. Al eń qymbat týr Aqtaý qalasyna jasaldy. Baǵasy - 1,2 mıllıon teńge. Barlyq týr boıynsha balalar demalatyn jerge ushaqpen tegin baryp keldi.
"Bir otbasy jeti balamen ushqan. Sol Almatyǵa ushqan bir otbasynyń ótemaqysy 369,8 myń tegege deıin jetken. Bul – eń iri soma. Negizi bir ótinish aıasynda týrısik operatorlarǵa shamamen 107 myń teńge tólenip turady. Sonda bir balaǵa 50-55 myń teńgeniń sýbsıdıasy tólenedi", - deıdi kompanıa mamandary.
Aviata da Kids go free baǵdarlamasyna qosyldy. Kompanıa týroperatorlarǵa balalardyń áýe bıletterin 45 kúnge bólip tóleýge múmkindik berip otyr.
Al Global Nomads árbir týrǵa syıaqy sertıfıkatyn qosyp berýge múddeli.