Qurban aıt – musylmandardyń jyl saıyn atap ótetin qasıetti dinı merekesi. Úsh kúnge sozylady. Hıjra – musylman kúntizbesi boıynsha Zúlhıja aıynyń onynshy juldyzynda (Arafa kúninen keıin) jáne Oraza aıt meıramynan 70 kún ótkennen soń bastalady, dep habarlaıdy Almaty-akshamy.kz Almaty.tv-ge silteme jasap.
Qurban aıt kezinde musylmandardyń shamasy kelgeni qajyǵa barady. Aıttyń úsh kúninde jasalatyn ǵıbadat kezinde olar Saýd-Arabıa elindegi Mekke, Medıne qalalaryn aralap, paıǵambarymyz Muhammedtiń júrgen jerlerin kóredi jáne izgi isterimen tanysady. Qurbandyq shalady.
Qurbandyqqa qandaı mal shalynady?
Qurbandyq úshin maldyń úsh túrin: túıe, sıyr, qoı ne bolmasa eshkini soıýǵa bolady. Qusty soıýǵa bolmaıdy, al jylqy maly Imam Aǵzam joly boıynsha soǵys kóligi sanalatyndyqtan, qurbandyqqa jatpaıdy. Qurbandyqqa qoı men eshkiniń bir jasqa tolǵany, túıeniń bes, sıyr men ógizdiń eki jasqa tolǵany soıylady. Bulardyń dene músheleri túgel ári saý bolýy shart.
Qurbandy ne úshin shalady?
Qurbandyq – musylman tanymy boıynsha Qudaıdyń razylyǵy úshin beriletin sadaqa, dinı amal. Musylman ǵalymdary qurban shalýdy ýájip etilgen amal sanaıdy. Iaǵnı, jaǵdaıy bar adamdar shalsa bolady. Ol úshin eń aldymen nıettenedi. Sosyn jaramdy sanalǵan maldy qurbandyqqa shalady. Bul – Ibrahım paıǵambardan kele jatqan rásim.
Mekkeniń janynda Ibrahım óziniń ulyn qurbandyqqa shalmaq bolady. Biraq Quran Kárimde ulynyń aty atalmaıdy, ańyzdarda Ismaıl delinedi. Alla Ibrahımniń nıetine rıza bolyp, ulynyń ornyna qurbandyqqa shalýǵa kókten toqty túsiredi. Sodan beri Alla jolyna qurbandyqqa qoı shalý dástúri jalǵasyp keledi. Quranda baıandalatyn bul oqıǵalar (14-súre, 41-aıat; 37-súre, 41-aıat) Taýratta da kezdesedi (Byt: 1-12, 22:2-12).
Qurban shalýdyń máni
Pitir – jan sadaqasy. Zeket – mal sadaqasy. Qurbandyq – ár pendeniń búkil adamzat álemi aldynda óteıtin paryzyn kórsetetin, dinı nanym boıynsha Qudaı aldynda óz mısıasyn aqtaýǵa daıyn ekendigin bildiretin sadaqa.
Qurbandyqtyń etin kimge bergen durys?
Jan sany kóp nemese qıynshylyǵy bar otbasylar qurbandyq etin tolyqtaı ózderine qaldyrady. Al sıyr ne túıe soıǵandar muqtaj jandarǵa taratyp beredi. Onda tek úsh bólekke bólip taratý degen shek joq. Eń mańyzdysy, muqtajdardyń ne nıeti túzý adamdardyń paıdasyna jarap, qarnyn toıdyrsa jetip jatyr.