Bıyl qasıetti Qurban aıt meıramyn musylmandar 6, 7 jáne 8 maýsym kúnderi atap ótedi. Almatynyń jeti aýdanynda osyǵan oraı úlken meshitterge jaqyn jerde qurban shalatyn 12 arnaýly oryn ashyldy. Qalanyń bas ımamy Tólebı Ospan men Din isteri basqarmasynyń bólim basshysy Dosqan Rahmetildaev Almaty qalasynyń Óńirlik komýnıkasıalar qyzmetinde osylaı dep habarlady.
6 maýsym kúni tańǵy saǵat 06:00-de qalanyń 56 meshitinde Aıt namazy oqylady. Namazdan keıin birden qurbandyq shalý rásimi bastalady.
«Qurban aıt - bul jaı ǵana rásim emes, bul - janashyrlyq pen saýapty is. Bul kúnderi muqtaj jandarǵa qol ushyn sozyp, baýyrmal bolyp, izgilikke umtylǵan durys. Qalamyzdaǵy turǵyndardyń barlyq ıgi nıeti men amalyn Alla qabyl etsin», - dedi Almaty qalasynyń bas ımamy Tólebı Ospan.
Onyń aıtýynsha, jyldaǵydaı arnaýly oryndarda mal satylyp, qurbandyq shalynyp, et taratylady. Barlyq oryn taza, sharıǵat normalaryna da saı keledi. Dinı rásimdi meshittiń qyzmetkerleri baqylap otyrmaq.
Sondaı-aq, qaladaǵy 56 meshitte muzdatqysh ornatylyp, etti tońazytatyn kóliktermen de qamtamasyz etilgen. Qala turǵyndary shalǵan qurbandyǵyn jaqyn mańdaǵy meshitke aparyp, qaıyrymdylyqqa arnasa da bolady.
Dosqan Rahmetildaevtyń aıtýynsha, barlyq jerde quqyq qorǵaý organdarynyń, sanıtarlyq qyzmettiń jáne veterınarlyq baqylaý ınspeksıasynyń mamandary kezekshilik atqarady. Olar mal soıǵan kezde sanıtarlyq talaptyń saqtalýyn qadaǵalamaq. Sonymen qatar, qoǵamdyq tártip kúsheıip, ruqsat etilmegen jerde zańsyz saýda jasaýǵa jol bermeıdi.
Sonymen qatar, qurban.muftyat.kz onlaın-servısy ashylǵan. Bul saıt arqyly qashyqtan qurban shalýǵa tapsyrys berip, ony baqylaı alasyz. Sondaı-aq, et alǵysy kelgen muqtaj jandar da osy saıt arqyly ótinish bere alady.
Dinı sharalardan bólek, dástúrli merekelik baǵdarlama da josparlanǵan. Qurban aıt merekesine oraı barlyq meshitterde kıiz úıler tigilip, merekelik dastarhan jaıylady, ulttyq sport oıyndary ótkiziledi. Balalarǵa batýttar, táttiler men túrli oıyndar daıyndalǵan. Sonymen qatar, din qyzmetkerleri balalar úıine baryp, búldirshinderge syılyqtar tabystap, olardy aıt merekesimen quttyqtamaq.
Almaty qalasynda qurban shalý ruqsat etilgen oryndardyń tizimi:
Alataý aýdany boıynsha:
1. «Myrzahmet» meshiti. Qarasý sh/a, Soltústik aınalma joly kóshesi, 15.
2. «Ásker ata» meshiti. Aıgerim-1 sh/a, Benberın kóshesi, 18/4.
3. «Alǵabas» meshiti. Alǵabas sh/a, Saıgúbe kóshesi, 6.
Bostandyq aýdany boıynsha:
1. «Baqytkeldi» meshiti. Han-Táńiri sh/a, Dýlatı kóshesi, 27/11.
Medeý aýdany boıynsha:
1. «Omar ıbn ál-Hattab» meshiti. Jýkov kóshesi, 136 A.
2. «Amanqul ata» meshiti. T. Bıgeldınov kóshesi, 5.
3. «Fatıma» meshiti. Sh. Jánibek kóshesi, 148.
4. «Raıymbek batyr» meshiti. Dýman-1 sh/a, Han Táńiri kóshesi, 15.
5. «Arafat» meshiti. Ibragımov kóshesi, 5 A.
Naýryzbaı aýdany boıynsha:
1. «Qalqaman-2» meshiti. Qalqaman-2 sh/a, Aspandıarov kóshesi, 84.
Túrksib aýdany boıynsha:
1. «Qaırat» meshiti. Qaırat sh/a, Sarymoldaev kóshesi, 22.
Jetisý aýdany boıynsha:
1. «Ál-Mádına» meshiti. Fedorov kóshesi, 12.
«Qala turǵyndary men qonaqtarynan joǵaryda atalǵan meken-jaıda ǵana maldy satyp alý jáne soıý qajettigin eskertemiz», - dep atap ótti spıkerler.