Qazaqstandyq ónerpazdar Saratovtaǵy «Sırk hanshaıymy – 2025» halyqaralyq festıvalinde «Altyn tájdi» jeńip aldy
Qazaqstandyq sırk artıseri Jasmına Alshynbaeva men Avelına Gýzeı Reseıdiń Saratov qalasynda ótken XI Halyqaralyq sırk óneri festıvali «Sırk hanshaıymy – 2025»-te eń joǵary marapat — Altyn tájdiń ıegeri atandy, dep habarlaıdy
2005 jyldan beri ótkizilip kele jatqan bul aıtýly forým álemniń túkpir-túkpirinen sırk sahnasynyń úzdik ókilderin jınap, sırk óneriniń damýyna áıelderdiń qosqan úlesin erekshe atap ótedi. Bıyl Reseıdiń eń kóne sırki — aǵaıyndy Nıkıtınder atyndaǵy Saratov memlekettik sırk arenasynda AQSH, Meksıka, Qytaı, Vetnam, Ispanıa jáne Qazaqstan sekildi 13 elden qatysýshylary óner kórsetti.
Qazaqstan atynan Qazaq memlekettik sırkiniń artıseri – áıgili sırk áýletiniń ókili Jasmına Alshynbaeva men talantty áýe gımnastshysy Avelına Gýzeı qatysty. Olar qoıýshy-rejısser Zarına Tapalovanyń jetekshiligimen alǵash ret «Áýe sferasy» dep atalatyn «saqınada juptasa óner kórsetý» janry boıynsha nómir usyndy.
Kúsh, sulýlyq jáne minsiz tehnıkany ushtastyrǵan bul áserli qoıylym halyqaralyq qazylar alqasy men kórermenderdi tánti etip, ónerpazdar festıváldiń bas júldesin ıelendi.
«Biz bul nómirdi birneshe aı boıy daıyndadyq, ár qımylymyzdy ábden ushtadyq. Bul óte jaýapty sát boldy: premera, jańa sahna, halyqaralyq qazylar. Biraq kúmbez astyna shyqqan sátte qobaljý shabytqa aınaldy. Bul bizdiń juldyzdy sátimiz boldy», - dedi Jasmına Alshynbaeva.
Qazaqstandyq gımnastshylardyń bul jeńisi – jekelegen jetistik emes, búkil otandyq sırk óneri úshin zor tabys. Bul Qazaqstannyń kásibı deńgeıiniń jáne shyǵarmashylyq áleýetiniń álemdik arenada joǵary ekenin dáleldeıtin úlken jetistik.