Almatyda qalalyq Máslıhattyń kezekten tys XXVII sesıasy ótti.
Kún tártibindegi máselelerdiń biri-jańadan qurylǵan qoǵamdyq kólik marshrýttaryn halyqqa qoljetimdi etý úshin áleýmettik mańyzy bar dep taný, dep habarlaıdy aqshamnews.kz.
Qalalyq Máslıhat depýtattarynyń aldynda sóılegen sózinde Almatynyń mobıldilik basqarmasynyń basshysy Saǵyndyq Telibaev qala mańyndaǵy turǵyndardyń edáýir bóliginiń qoǵamdyq kóliktiń jetispeýshiligi problemasyna tap bolyp otyrǵanyn, bul olardy jeke tasymaldaý qyzmetterin paıdalanýǵa májbúr etetinin atap ótti.
«Kún saıyn qala aýmaǵyna 300 myńnan astam kólik keledi. Qala aýmaǵyna kiretin kólik quraldarynyń joǵary aǵynyn qysqartý jáne qala turǵyndarynyń mobıldiligin arttyrý maqsatynda búginde Almaty ákimdigi 147 qalalyq jáne 54 qala mańyndaǵy marshrýttardy uıymdastyrdy. Onyń ishinde áleýmettik mańyzy bar qatynastar tizbesine tek 178 marshrýt engizilgen. Halyq úshin qalǵan 23 marshrýttyń qoljetimdiligin qamtamasyz etý maqsatynda olardy áleýmettik mańyzy bar qatynastar tizbesine engizý qajet», - dep atap ótti basqarma basshysy.
Otyrys qorytyndysy boıynsha depýtattar bul usynysty qoldady.
Aıta keteıik, 2024 jyly Almaty ákimi Erbolat Dosaevtyń tapsyrmasymen qalada qala mańyndaǵy 20 jáne 2 qalalyq marshrýt iske qosyldy. Aǵymdaǵy jyly qoǵamdyq kóliktiń qoljetimdiligin arttyrý jáne damytý maqsatynda 800 ekologıalyq taza avtobýs satyp alý josparlanýda.