Qalalyq mobıldilik basqarmasy- Almatyda qoǵamdyq kólikte jańa tarıftik usynym ázirlenýde
VIII saılanǵan Almaty máslıhatynyń kezekten tys XXI sesıasy barysynda depýtattar jol júrý qunyn 120 teńgege deıin arttyrýdy kózdeıtin ákimdik qaýlysynyń jobasyn qarady, dep habarlaıdy almaty-akshamy.kz
Atalǵan máseleni talqylaý barysynda depýtat Altynaı Kóbeeva jol júrý tarıfiniń kóterilýi jolaýshylar úshin neǵurlym qolaıly jaǵdaılardy qamtamasyz etýi tıis ekenin atap ótip, qalalyq mobıldilik basqarmasy basshysynan qalanyń qoǵamdyq kóligi qalaı damıtyny týraly tolyq aıtyp berýin surady.
Óz kezeginde Saǵyndyq Telibaev búgingi tarıftiń kóterilýi birinshi kezekte qoǵamdyq kólikke tehnıkalyq qyzmet kórsetýdiń jedeldigi men sapasyna, júrgizýshilerdi qosymsha yntalandyrýǵa jáne qazirgi ýaqytta jańa avtobýstar satyp alýǵa oń áser etetinin habarlady.
«Normatıvtik ózgeristersiz odan ári damytý múmkin emes. Osyǵan baılanysty, biz qoldanystaǵy zańnamaǵa tolyqtyrýlar engizýge bastamashylyq jasadyq jáne búgingi tańda qala ákimdigi Almaty jáne Almaty aglomerasıasy aýmaǵynda qoldanystaǵy sýbsıdıalaý qaǵıdalaryn ázirleý quzyretine ıe. Biz qoǵamdyq kóliktiń jańa retteýshi modelin ázirlep jatyrmyz, onyń aıasynda sýbsıdıalaý tetikteri men tasymaldaýshylarǵa qoıylatyn talaptar qaıta qaralatyn bolady. Sonymen qatar, kólikten ekinshisine tegin aýysyp otyrý múmkindigi bar jańa tarıftik usynym ázirlenýde. Atalǵan sharalardy iske asyrý tasymaldaýshylardyń jaýapkershiligin arttyrady, sondaı - aq kórsetiletin qyzmetterdiń sapasyn aıtarlyqtaı jaqsartady», - dep atap ótti QMB-nyń basshysy.
Sonymen qatar, ol ótken jyldyń jeltoqsan aıynda qabyldanǵan Kólik qańqasynyń negizi jyldam qoǵamdyq kólik - Metro, LRT jáne BRT bolyp tabylatynyn atap ótti. Onyń aıtýynsha, búginde «Qalqaman» metro stansıasynyń qurylysy boıynsha jumystar júrgizilýde, sodan keıin metrony «Barlyq» bazaryna deıin uzartý, taǵy 3 jańa stansıa salý josparlanýda.
«Bıylǵy jyly biz Raıymbek dańǵyly boıynsha BRT-nyń birinshi ýchaskesin salýǵa jáne Jeltoqsan kóshesi boıynsha Tımırázev kóshesinen Raıymbek dańǵylyna deıin BRT-ny jalǵastyrýǵa kirisemiz. Sondaı-aq, Tóle bı kóshesi boıynsha LRT qurylysyna TEN (tehnıkalyq ekonomıkalyq negizdeme) ázirleý jalǵasýda. Atalǵan jobalardy iske asyrý qoǵamdyq kólikti damytýǵa oń áser etedi, qala turǵyndary úshin qozǵalys yńǵaıly bolady», - dep qorytyndylady Saǵyndyq Telibaev.