Qoǵamdyq kólik basqarý kategorıasy joq avtobýs júrgizýshisine aıyppul salyndy.
Almatyda qoǵamdyq kólik júrgizýshisine aıyppul salyndy, dep habarlaıdy Almaty-akshamy.kz Polisia.kz-ke silteme jasap.
Almatyda jol-kólik oqıǵalarynyń aldyn alý men onyń saldaryn azaıtýǵa baǵyttalǵan “Qaýipsiz jol” respýblıkalyq aılyǵy ótýde.
"Onyń maqsaty – aldyn alý jumystaryn jandandyrý jáne jol qozǵalysyna qatysýshylar arasynda jol qozǵalysy qaýipsizdigi talaptarynyń saqtalýyna baqylaýdy kúsheıtý, tıisti qoǵamdyq tártipti, jol qaýipsizdigin qamtamasyz etý jáne kóliktegi jazataıym oqıǵalardy azaıtý. Jolaýshylar men júkterdi kólikpen tasymaldaýdy júzege asyrý barysynda jol qaýipsizdigin qamtamasyz etýdi baqylaýǵa da erekshe nazar aýdarylatyn bolady", – dedi Almaty qalalyq PD Ákimshilik polısıa basqarmasy bastyǵynyń orynbasary Bolatbek Baıatanov.
Rysqulov dańǵylynda 47-shi baǵyttaǵy qoǵamdyq kólikti tekserý úshin toqtatqan. Júrgizýshisinde qoǵamdyq kólik júrgizý kategorıasy joq ekeni anyqtaldy.
"Er adam QR ÁQBtK-niń 612-baby 4-bóligi boıynsha ákimshilik jaýapkershilikke tartyldy. Aıyppul somasy 93 myń teńgeni qurady. Osy rette aıta keteıin, dál osy júrgizýshige bir aı buryn qoǵamdyq kólikti júrgizýge quqyǵy joq ekeni alǵash anyqtalǵanda aıyppul salǵan bolatynbyz. Biraq kórip turǵanymyzdaı, durys qorytyndy shyqpady. Onyń ústine avtopark basshylyǵy da bul zań buzýshylyqty joıý úshin eshqandaı shara qoldanbaı, avtobýsty júrgizýge quqyǵy joq júrgizýshini qaıtadan jolǵa shyǵardy. Bul joly avtokásiporyn ákimshiligi QR ÁQBtK-niń 619-baby boıynsha jaýapqa tartyldy. Aıyppul mólsheri – 40 AEK", – deıdi Áýezov aýdandyq PB ákimshilik tájirıbe bóliminiń basshysy Baýken Báıimbetov.
Osy kezde Jetisý aýdanynyń polıseıleri qalaaralyq jolaýshylar tasymalymen aınalysatyn avtobýstardyń tehnıkalyq jaǵdaıyn tekserdi. Reıd elimizdiń ońtústik óńirlerine turaqty avtobýstar shyǵatyn bazarlardyń biriniń aýmaǵynda júrgizildi.
"Júrgizýshiler tarapynan bolǵan usaq buzýshylyqtar sol jerde joıyldy. Óreskel quqyq buzýshylyqtar anyqtalǵan jaǵdaıda avtobýs reısten shyǵarylyp, mamandandyrylǵan aıyppul turaǵyna jetkizildi. Aldyńǵy sheptegi qyzmetterdiń jeke quramyna júktelgen negizgi mindet – jol qozǵalysy erejelerin buzý derekterin, JQE talaptaryn elemeıtin júrgizýshilerdi anyqtaý, jolyn kesý, óreskel buzýshylyqtardan bastap kólikti mas kúıinde júrgizý, qarsy baǵyttaǵy qozǵalys jolaǵyna shyǵý, qaýipsizdik beldikterin qoldanbaý, kólik quralyn júrgizý kezinde telefonmen sóılesý, memlekettik nómiri joq kólik quralyn júrgizý, jol-kólik oqıǵasynyń belgileri aıqyn kólikterdi anyqtaý", – dedi B.Baıatanov.